ក្រុមប្រដាប់អាវុធដែលគាំទ្រដោយអ៊ីរ៉ង់ នៅថ្ងៃចន្ទ (ទី២៣ ខែមីនា ឆ្នាំ២០២៦) នេះ បានប្រកាសថា ខ្លួននឹងបន្តការផ្អាករយៈពេល ៥ថ្ងៃបន្ថែម ពាក់ព័ន្ធនឹងការវាយប្រហារស្ថានទូតអាមេរិក នៅទីក្រុងបាកដាដ ប្រទេសអ៊ីរ៉ាក់។

តាំងពីដើមដំបូងនៃសង្គ្រាម នៅតំបន់មជ្ឈិមបូព៌ា ក្រុមប្រដាប់អាវុធគាំទ្រអ៊ីរ៉ង់ បានអះអាងទទួលខុសត្រូវ ចំពោះការវាយប្រហារស្ទើរតែរាល់ថ្ងៃលើធនធានរបស់សហរដ្ឋអាមេរិក ទាំងនៅក្នុងប្រទេសអ៊ីរ៉ាក់ និងទូទាំងតំបន់ ខណៈពេលដែលការវាយប្រហារ ក៏បានកំណត់គោលដៅលើក្រុមទាំងនេះផងដែរ។

កាលពីថ្ងៃទី១៩ ខែមីនា ក្រុម Kataeb Hezbollah ដែលត្រូវបានទីក្រុងវ៉ាស៊ីនតោន កំណត់ថា ជា «អង្គការភេរវកម្ម» បានឲ្យដឹងថា ខ្លួននឹងបញ្ឈប់ការវាយប្រហារលើស្ថានទូត នៅទីក្រុងបាកដាដ ក្រោមលក្ខខណ្ឌមួយចំនួន ក្នុងនោះរួមទាំងការបញ្ចប់ការវាយប្រហារលើតំបន់លំនៅឋានរបស់អ៊ីរ៉ាក់ និងជាយក្រុងភាគខាងត្បូងនៃទីក្រុងបេរូតរបស់ប្រទេសលីបង់ផងដែរ។

តំបន់ជាយក្រុងបេរូត គឺជាបន្ទាយរបស់ក្រុមហេសបូឡារបស់ប្រទេសលីបង់ ដែលក៏គាំទ្រដោយអ៊ីរ៉ង់ និងកំពុងធ្វើសង្គ្រាមជាមួយអ៊ីស្រាអែលផងដែរ។ នៅក្នុងសេចក្តីថ្លែងការណ៍មួយ នាថ្ងៃទី២៣ ខែមីនានេះ ក្រុម Kataeb Hezbollah បានឲ្យដឹងថា៖ «កាលកំណត់ដែលផ្តល់ឲ្យស្ថានទូតអាមេរិក នឹងត្រូវបានបន្តរយៈពេលបន្ថែម ៥ថ្ងៃទៀត»។

អ៊ីរ៉ាក់ត្រូវបានទាញចូលទៅក្នុងជម្លោះ ក្នុងតំបន់ ដោយមិនមានបំណងដែលបង្កឡើងដោយការវាយប្រហាររបស់សហរដ្ឋអាមេរិក-អ៊ីស្រាអែល លើអ៊ីរ៉ង់ កាលពីថ្ងៃទី២៨ ខែកុម្ភៈ។ ការប្រកាសរបស់ក្រុម Kataeb Hezbollah បានកើតឡើងបន្ទាប់ពីមានការវាយប្រហារជាបន្តបន្ទាប់ នាពេលយប់ ដែលផ្តោតលើមជ្ឈមណ្ឌលការទូត និងភស្តុភាររបស់សហរដ្ឋអាមេរិក នៅអាកាសយានដ្ឋានអន្តរជាតិទីក្រុងបាកដាដ៕