ក្រសួងសន្តិសុខមាតុភូមិ (DHS) កាលពីថ្ងៃអាទិត្យ (ទី២២ ខែមីនា ឆ្នាំ២០២៦) បានឲ្យដឹងថា អវត្តមាន ក្នុងចំណោមបុគ្គលិកសន្តិសុខដឹកជញ្ជូន កាលពីចុងសប្តាហ៍កន្លងទៅ បានឈានដល់កម្រិតខ្ពស់បំផុត ចាប់តាំងពីដំណើរការបិទរដ្ឋាភិបាលដោយផ្នែក បានចាប់ផ្តើមកាលពី ៥សប្តាហ៍កន្លងទៅ ខណៈដែលទីភ្នាក់ងារអនុវត្តច្បាប់អន្តោប្រវេសន៍ បានត្រៀមជាស្រេច ដើម្បីបំពេញការងារជំនួសអ្នកទាំងនោះ នៅអាកាសយានដ្ឋានដ៏មមាញឹកបំផុតមួយចំនួនរបស់សហរដ្ឋអាមេរិក។

នៅអាកាសយានដ្ឋាន ក្នុងទីក្រុង Houston, New York និង Atlanta បុគ្គលិករដ្ឋបាលសន្តិសុខដឹកជញ្ជូន (TSA) ជាង ១ភាគ៣ បានទូរស័ព្ទទៅសុំច្បាប់ឈឺ ឬមិនបានទៅធ្វើការ ខណៈដែលដំណើរការបិទរដ្ឋាភិបាលនេះ បានធ្វើឲ្យមនុស្សរាប់ម៉ឺននាក់ធ្វើការដោយមិនមានប្រាក់ឈ្នួល ខណៈដែលសមាជិកសភាគណបក្សប្រជាធិបតេយ្យ និងសាធារណរដ្ឋជជែកដេញដោល អំពីថវិការបស់ DHS។

ដើម្បីជួយបំពេញចន្លោះខ្វះខាតបុគ្គលិកនេះ បុគ្គលិករាប់រយនាក់របស់ទីភ្នាក់ងារអនុវត្តច្បាប់អន្តោប្រវេសន៍ និងគយ (ICE) នឹងត្រូវបានដាក់ពង្រាយទៅកាន់អាកាសយានដ្ឋាន ចាប់ពីថ្ងៃទី២៣ ខែមីនានេះ។ នេះបើយោងតាមការឲ្យដឹងពីមន្ត្រីរដ្ឋាភិបាល។

DHS បានឲ្យដឹងកាលពីថ្ងៃទី២២ ខែមីនាថា ខ្លួននឹងមិនចែករំលែកព័ត៌មានលម្អិតជាសាធារណៈឡើយ អំពីការដាក់ពង្រាយបុគ្គលិក ICE ដើម្បីរក្សាសន្តិសុខប្រតិបត្តិការ ប៉ុន្តែប្រភពព័ត៌មានដែលត្រូវបានរាយការណ៍ប្រាប់អំពីបញ្ហានេះ បាននិយាយថា ផែនការបច្ចុប្បន្នអំពាវនាវឲ្យមានដាក់ពង្រាយភ្នាក់ងារ ICE ទៅកាន់ទីតាំងចំនួន ១៤ ទោះបីជាតួលេខនោះអាចមានការប្រែប្រួលក៏ដោយ។

ប្រភពទាំងនេះ បានបន្ថែមថា សម្រាប់ពេលនេះ បុគ្គលិក ICE នឹងមិនត្រូវបានដាក់ពង្រាយនៅទីតាំងខាងក្រោយចំណុចត្រួតពិនិត្យសន្តិសុខអាកាសយានដ្ឋានឡើយ ដោយសារតែពួកគេមិនមានការអនុញ្ញាតផ្លូវការដែលត្រូវការចាំបាច់៕