កាលពីថ្ងៃអាទិត្យ អេហ្ស៊ីបបានថ្កោលទោសយ៉ាងដាច់អហង្ការចំពោះការវាយប្រហារថ្មីៗរបស់អ្នកតាំងលំនៅអ៊ីស្រាអែលប្រឆាំងនឹងប្រជាជនប៉ាឡេស្ទីននៅតំបន់វេសបែង ( West Bank)ដោយហៅ ពួកវាទាំងនោះថា៖«ការកើនឡើងភាពតានតឹងដ៏គ្រោះថ្នាក់» និង «ការរំលោភបំពានយ៉ាងធ្ងន់ធ្ងរលើច្បាប់មនុស្សធម៌អន្តរជាតិ»។

ក្រសួងការបរទេសអេហ្ស៊ីប បាននិយាយនៅក្នុងសេចក្តីថ្លែងការណ៍មួយថា ការវាយប្រហារទាំងនេះ ដែលធ្វើឡើង ក្រោមការការពាររបស់កងកម្លាំងអ៊ីស្រាអែល មានគោលបំណងបំភិតបំភ័យជនស៊ីវិលប៉ាឡេស្ទីន ដោយសម្តែងការព្រួយបារម្ភយ៉ាងខ្លាំងចំពោះការកើនឡើងនូវអំពើហិង្សារបស់អ្នកតាំងលំនៅ ដោយព្រមានថា ទង្វើនេះឆ្លុះបញ្ចាំងពីផែនការជាប្រព័ន្ធ ដើម្បីផ្លាស់ប្តូរស្ថានភាពបច្ចុប្បន្ន និងដាក់ចេញនូវគោលនយោបាយច្បាស់លាស់ជាក់ស្តែង។

សេចក្តីថ្លែងការណ៍ បានបញ្ជាក់ថា ការអនុវត្តបែបនេះរំលោភលើសេចក្តីសម្រេចស្របច្បាប់អន្តរជាតិ ជាពិសេសសេចក្តីសម្រេចលេខ ២៣៣៤ របស់ក្រុមប្រឹក្សាសន្តិសុខអង្គការសហប្រជាជាតិ និងផ្ទុយនឹងយោបល់ប្រឹក្សារបស់តុលាការយុត្តិធម៌អន្តរជាតិលើភាពខុសច្បាប់នៃសកម្មភាពកាន់កាប់ និងការតាំងលំនៅ។

អេហ្ស៊ីបបានជំរុញឲ្យសហគមន៍អន្តរជាតិបញ្ឈប់ការរំលោភបំពាន ធានាការការពារសម្រាប់ជនស៊ីវិលប៉ាឡេស្ទីន និងធ្វើឲ្យអ្នកដែលទទួលខុស ឲ្យត្រូវទទួលខុសត្រូវចំពោះទង្វើរបស់ពួកគេ ដោយបានអំពាវនាវឲ្យមានការបន្ធូរបន្ថយភាពតានតឹង ដើម្បីបើកផ្លូវសម្រាប់ដំណោះស្រាយដ៏យុត្តិធម៌ និងទូលំទូលាយចំពោះបញ្ហាប៉ាឡេស្ទីន៕