នាយករដ្ឋមន្ត្រីលីបង់ លោក Nawaf Salam កាលពីថ្ងៃអាទិត្យ (ទី២២ ខែមីនា ឆ្នាំ២០២៦) បាននិយាយថា សមាជិកនៃកងកម្លាំងឆ្មាំបដិវត្តន៍អ៊ីរ៉ង់ (IRGC) កំពុងបញ្ជាប្រតិបត្តិការរបស់ក្រុមហេសបូឡា នៅក្នុងសង្គ្រាមដែលកំពុងបន្តមាន ប្រឆាំងនឹងអ៊ីស្រាអែល។

នៅក្នុងបទសម្ភាសន៍ជាមួយបណ្តាញសារព័ត៌មាន Al Hadath លោក Salam បានរិះគន់ម្តងទៀតទៅលើក្រុមហេសបូឡាថា បានអូសទាញប្រទេសលីបង់ឲ្យធ្លាក់ចូលទៅក្នុងសង្គ្រាមមជ្ឈិមបូព៌ា ដោយការបាញ់រ៉ូកែតទៅអ៊ីស្រាអែល។

ដោយសំដៅទៅលើមេដឹកនាំកំពូលរបស់អ៊ីរ៉ង់ លោក Ayatollah Ali Khamenei ដែលត្រូវបានសម្លាប់កាលពីថ្ងៃទី២៨ ខែកុម្ភៈ ដែលជាថ្ងៃបើកឆាកសង្គ្រាម លោកបានលើកឡើងថា៖ «វាត្រូវបានប្រកាសថា សង្គ្រាមនេះ គឺជាការសងសឹក ចំពោះការធ្វើឃាតលោក Khamenei ដូច្នេះនេះមានន័យថា សង្គ្រាមនេះត្រូវបានធ្លាក់មកលើយើង ទាំងដែលយើងមិនចង់»។

ហើយដោយសំដៅទៅលើឧប្បត្តិហេតុដែលយានដ្រូនផលិតដោយអ៊ីរ៉ង់ បានវាយប្រហារមូលដ្ឋានទ័ពអង់គ្លេស នៅប្រទេសស៊ីប កាលពីដើមខែមីនា លោក Salam បានបញ្ជាក់ថា៖ «នោះគឺជាកងឆ្មាំបដិវត្តន៍ ដែលមានវត្តមាន ហើយជារឿងគួរឲ្យសោកស្ដាយ កំពុងគ្រប់គ្រងប្រតិបត្តិការយោធានៅលីបង់»។ លោកបានបន្ថែមថា៖ «មនុស្សទាំងនោះបានក្លែងបន្លំលិខិតឆ្លងដែន និងចូលប្រទេសដោយខុសច្បាប់«។

យានដ្រូនផលិតដោយអ៊ីរ៉ង់ បានវាយប្រហារមូលដ្ឋានទ័ពអង់គ្លេសមួយកន្លែង នៅស៊ីប កាលពីដើមខែមីនា ដោយទីក្រុង Nicosia បានប្រាប់ថា យានដ្រូននេះទំនងជាត្រូវបានបាញ់ដោយក្រុមហេសបូឡា ដែលគាំទ្រដោយទីក្រុងតេអេរ៉ង់ នៅលីបង់ មិនមែនមកពីអ៊ីរ៉ង់ដោយផ្ទាល់ឡើយ។ លោក Salam បានសំដៅទៅលើកងកម្លាំងការពារបដិវត្តន៍ ដែលប្រកាសពីប្រតិបត្តិការរួមគ្នា ជាមួយក្រុមហេសបូឡាប្រឆាំងនឹងអ៊ីស្រាអែលថា ជាភស្តុតាងនៃការបញ្ជារបស់ពួកគេលើសង្គ្រាម នៅលីបង់៕