សារព័ត៌មានក្នុងស្រុក រាយការណ៍ថា មនុស្ស ៣នាក់ បានរងរបួស និងមនុស្សជាច្រើននាក់ផ្សេងទៀត ត្រូវបានជម្លៀសចេញ ក្រោយហេតុការណ៍ផ្ទុះបណ្តាលឲ្យអគារផ្ទះល្វែង ៣ខ្នង បាក់រលំ នៅទីក្រុងរ៉ូម ប្រទេសអ៊ីតាលី កាលពីថ្ងៃអាទិត្យ ។

របួសរបស់ពួកគេ ពុំត្រូវបានគេជឿថា គំរាមកំហែងដល់អាយុជីវិតនោះទេ ។ បុរសវ័យ ២៤ឆ្នាំម្នាក់ ត្រូវបាននាំទៅកាន់មន្ទីរពេទ្យ ។ ហេតុការណ៍ផ្ទុះនេះ បានកើតមានឡើង នៅតំបន់ជាយក្រុង Piane del Sole ។

សាក្សីនិយាយថា មនុស្សវ័យចំណាស់ ២នាក់ ម្នាក់អាយុ ៨៤ឆ្នាំ និងម្នាក់ទៀតអាយុ ៨៦ឆ្នាំ បានរងរបួស នៅក្នុងហេតុការណ៍ផ្ទុះនេះ ។ ស្រ្តីវ័យចំណាស់ម្នាក់ ត្រូវបានគេរកឃើញក្នុងអាងងូតទឹក ហើយបុរសវ័យចំណាស់ម្នាក់ទៀត ត្រូវបានគេរកឃើញនៅជិតកម្ទេចកម្ទីអគារ ។ ពួកគេទាំង ២នាក់ ត្រូវបានបញ្ជូនទៅកាន់មន្ទីរពេទ្យ Sant'Eugenio ដើម្បីព្យាបាលរបួស ។

កាសែត Telegrafi រាយការណ៍ថា មនុស្សប្រហែល ៧០នាក់ ត្រូវបានជម្លៀសចេញពីកន្លែងកើតហេតុ ។

សារព័ត៌មានក្នុងស្រុករាយការណ៍ថា ហេតុការណ៍ផ្ទុះនេះ ទំនងបណ្តាលមកពីធុងហ្គាស ខណៈការស៊ើបអង្កេតកំពុងធ្វើឡើង ៕