អ្នកថតរូបរបស់ទីភ្នាក់ងារសារព័ត៌មាន AFP ម្នាក់ បានឲ្យដឹងថា នាវាផ្ទុកយន្តហោះធំជាងគេបំផុតរបស់ពិភពលោក គឺ USS Gerald R. Ford ដែលជាផ្នែកមួយនៃប្រតិបត្តិការសង្គ្រាម នៅតំបន់មជ្ឈិមបូព៌ា បានវិលត្រឡប់ទៅកាន់មូលដ្ឋានទ័ពជើងទឹកនៅកោះ Crete របស់ប្រទេសក្រិកទៅវិញហើយ នៅថ្ងៃចន្ទ (ទី២៣ ខែមីនា ឆ្នាំ២០២៦) នេះ។

នាវានេះ ដែលបានដឹកស្បៀងអាហារ ប្រេងឥន្ធនៈ និងគ្រាប់រំសេវ នៅឈូងសមុទ្រ Souda កាលពីខែកុម្ភៈ បានរាយការណ៍ពីការមានអគ្គិភ័យឆេះកន្លែងបោកគក់ កាលថ្ងៃទី១២ ខែមីនា ជាហេតុការណ៍ដែលបានធ្វើឲ្យសមាជិកនាវិក ២នាក់រងរបួស។ USS Gerald R. Ford គឺជានាវាផ្ទុកយន្តហោះថ្មីបំផុត និងធំជាងគេបំផុតរបស់អាមេរិក។

គួរនបញ្ជាក់ថា នាវាចម្បាំងនេះត្រូវបានដាក់ពង្រាយអស់រយៈពេល ៩ខែមកហើយ ក្នុងនោះមានរួមទាំងការចូលរួម ក្នុងប្រតិបត្តិការប្រឆាំងនឹងប្រទេសវ៉េណេស៊ុយអេឡា នៅតំបន់ការ៉ាអ៊ីព មុនពេលទៅដល់មជ្ឈិមបូព៌ា។ រយៈពេលនៃការដាក់ពង្រាយនេះ បានធ្វើឲ្យមានជាការចោទសួរ អំពីភាពជឿជាក់របស់នាវិកនៅលើនាវានេះ និងការត្រៀមខ្លួនរបស់នាវាចម្បាំង។

សហរដ្ឋអាមេរិក និងអ៊ីស្រាអែល បានចាប់ផ្តើមយុទ្ធនាការផ្លូវអាកាសដ៏ធំមួយ លើអ៊ីរ៉ង់ កាលពីចុងខែកុម្ភៈ បន្ទាប់ពីមានការបង្កើនកម្លាំងយោធាយ៉ាងធំរបស់សហរដ្ឋអាមេរិក នៅតំបន់មជ្ឈិមបូព៌ា ដែលក្រៅពីនាវា USS Gerald R. Ford ក៏មាននាវាផ្ទុកយន្តហោះមួយគ្រឿងផ្សេងទៀតដែរ គឺ Abraham Lincoln៕