ប្រទេសរុស្ស៊ី នៅថ្ងៃចន្ទ (ទី២៣ ខែមីនា ឆ្នាំ២០២៦) បានអំពាវនាវមានដំណោះស្រាយ «នយោបាយ និងការទូត» ចំពោះសង្គ្រាមមជ្ឈិមបូព៌ា បន្ទាប់ពីមានឱសានវាទរបស់ប្រធានាធិបតីអាមេរិក Donald Trump ដើម្បីឲ្យអ៊ីរ៉ង់បើកច្រកសមុទ្រ Hormuz ឡើងវិញ។

លោក Trump បានគំរាម «បំផ្លាញ» រោងចក្រថាមពលរបស់អ៊ីរ៉ង់ ប្រសិនបើវាមិនបើកផ្លូវទឹកយុទ្ធសាស្ត្រឡើងវិញក្នុងរយៈពេល ៤៨ម៉ោង ដែលត្រូវបានគ្រោងនឹងបញ្ចប់នៅចុងថ្ងៃចន្ទ។ ផ្លូវទឹកនេះនៅតែត្រូវបានបិទយ៉ាងមានប្រសិទ្ធភាព ចាប់តាំងពីការចាប់ផ្តើមនូវសង្គ្រាមដែលផ្ទុះឡើងកាលពីថ្ងៃទី២៨ ខែកុម្ភៈ ដោយការទម្លាក់គ្រាប់បែករបស់សហរដ្ឋអាមេរិក-អ៊ីស្រាអែលលើអ៊ីរ៉ង់។

នៅក្នុងសន្និសីទសារព័ត៌មានមួយ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មាន ក្នុងនោះរួមមានទាំងពីសារព័ត៌មាន AFP ផងដែរថា៖ «យើងជឿថា ស្ថានភាពគួរតែបានផ្លាស់ប្តូរទៅជាដំណោះស្រាយនយោបាយ និងការទូត»។ 

លោក Peskov បានបន្តថា៖ «នេះគឺជាវិធីតែមួយគត់ដែលអាចរួមចំណែកយ៉ាងមានប្រសិទ្ធភាព ក្នុងការបន្ធូរបន្ថយស្ថានភាពតានតឹងដ៏មហន្តរាយ នៅក្នុងតំបន់នេះ»។

រុស្ស៊ី ដែលបានជួយសាងសង់រោងចក្រថាមពលនុយក្លេអ៊ែរតែមួយគត់របស់អ៊ីរ៉ង់ នៅទីក្រុង Bushehr បានព្រមានប្រឆាំងនឹងការវាយប្រហារដែលអាចធ្វើឲ្យប៉ះពាល់ដល់ទីតាំង ដែលអង្គការឃ្លាំមើលនុយក្លេអ៊ែររបស់អង្គការសហប្រជាជាតិ បានប្រកាសកាលពីសប្តាហ៍មុនថា ត្រូវបានវាយប្រហារដោយមីស៊ីល៕