នៅថ្ងៃចន្ទ (ទី២៣ ខែមីនា ឆ្នាំ២០២៦) សម្តេច ប៉ាប Leo បានរិះគន់ខ្លាំង ចំពោះការទម្លាក់គ្រាប់បែកពីអាកាស ដោយមានបន្ទូលថា វាគឺជាការវាយប្រហារដោយមិនរើសអើង ហើយគួរតែត្រូវបានហាមឃាត់ ដោយនេះជាការមានបន្ទូលប្រឆាំងសង្គ្រាមចុងក្រោយរបស់ព្រះអង្គ ខណៈដែលសង្គ្រាមរបស់សហរដ្ឋអាមេរិក-អ៊ីស្រាអែល លើអ៊ីរ៉ង់ បានឈានចូលដល់សប្តាហ៍ទី៤ ហើយ។

យ៉ាងណាក្ដី ព្រះអង្គម្ចាស់ Leo ដែលជាសម្តេចប៉ាបជនជាតិអាមេរិកដំបូងគេ មិនបានលើកឡើងជាពិសេសនោះឡើយ អំពីជម្លោះដែលកំពុងរីករាលដាល អំឡុងពេលយាងជួបជាមួយនាយកប្រតិបត្តិ និងបុគ្គលិកមកពីក្រុមហ៊ុនអាកាសចរណ៍ ITA Airways របស់ប្រទេសអ៊ីតាលី ប៉ុន្តែព្រះអង្គបានថ្កោលទោសយ៉ាងខ្លាំង ចំពោះការប្រើប្រាស់កម្លាំងទ័ពអាកាសក្នុងសង្គ្រាម។

សម្តេច ប៉ាប បានមានបន្ទូលបន្តថា៖ «គ្មាននរណាម្នាក់គួរមានការភ័យខ្លាច ដែលថា ការគំរាមកំហែងនៃការស្លាប់ និងការបំផ្លិចបំផ្លាញ អាចនឹងធ្លាក់មកពីលើមេឃនោះទេ»។ ព្រះអង្គបានមានបន្ទូលបន្ថែមថា៖ «បន្ទាប់ពីមានបទពិសោធន៍គួរឲ្យតក់ស្លុតនៃសតវត្សរ៍ទី២០ ការទម្លាក់គ្រាប់បែកតាមអាកាស គួរតែត្រូវបានហាមឃាត់ជារៀងរហូត។ យ៉ាងណាក្ដី ការធ្វើបែបនេះនៅតែមាន ហើយនេះមិនមែនជាវឌ្ឍនភាពទេ តែវាគឺជាការថយក្រោយ!»។

ជាមួយគ្នានេះ សម្តេច ប៉ាប បានអំពាវនាវម្តងហើយម្តងទៀតឲ្យមានបទឈប់បាញ់ នៅក្នុងសង្គ្រាមអ៊ីរ៉ង់។ កាលពីថ្ងៃអាទិត្យ ព្រះអង្គបានចាត់ទុកជម្លោះនេះថា ជា «ភាពគួរឲ្យអៀនខ្មាស សម្រាប់មនុស្សគ្រប់គ្នា»៕