ខេត្តពោធិ៍សាត់៖ ស្ថិតនៅក្រោមដំបូលនៃសន្តិភាពយ៉ាងពេញលេញ ប្រទេសកម្ពុជាមានការអភិវឌ្ឍន៍រីកចម្រើនឆ្ពោះទៅមុខជានិច្ច បើទោះជាប៉ុន្មានឆ្នាំចុងក្រោយនេះមានវិបត្តិសកលនៃការរីករាលដាលនៃជំងឺកូវីដ១៩ ក៏ដោយ ក៏រាជរដ្ឋាភិបាលកម្ពុជាដឹកនាំដោយសម្ដេចតេជោ ហ៊ុន សែន នៅតែអាចសម្រេចបាននូវសមិទ្ធផលធំៗជាច្រើនជាបន្តបន្ទាប់ ដើម្បីបម្រើដល់ផលប្រយោជន៍របស់ប្រជាពលរដ្ឋ។
ជាក់ស្ដែងនៅស្រុកក្រគរ ខេត្តពោធិ៍សាត់ កំពុងចាប់ផ្ដើមគម្រោងសាងសង់មជ្ឈមណ្ឌលពហុកីឡាដ្ឋានដ៏ធំមួយលើផ្ទៃដីប្រមាណ ២៥ហិកតានៅម្ដុំវាលសម្តេចយស ក្នុងភូមិវាលវង់ ឃុំស្នាអន្សា ជាប់នឹងកំណាត់ផ្លូវជាតិលេខ៥ ដោយសាងសង់ឡើងដើម្បីឆ្លើយតបនឹងតម្រូវការរបស់ប្រជាពលរដ្ឋ និងចូលរួមក្នុងការអភិវឌ្ឍវិស័យកីឡា ខណៈពេលដែលប្រទេសកម្ពុជាកំពុងឈានឆ្ពោះទៅធ្វើជាម្ចាស់ផ្ទះ រៀបចំការប្រកួតកីឡាតំបន់អាស៊ាន (Sea Game 2023)។ មជ្ឈមណ្ឌលនេះគ្រោងនឹងដាក់ឈ្មោះជាផ្លូវការថា មជ្ឈមណ្ឌលពហុកីឡដ្ឋានសម្តេចតេជោ ហ៊ុន សែន ( SAMDACH HUN SEN SPORT CENTER) ដើម្បីសម្តែងការដឹងគុណដល់សម្តេចតេជោ ហ៊ុន សែន ដែលបានលះបង់គ្រប់យ៉ាងក្នុងស្វែងរក និងថែរក្សាសន្តិភាពជូនជាតិមាតុភូមិ កែប្រែពីតំបន់ដែលធ្លាប់តែជាសមរភូមិសង្គ្រាមមកជាតំបន់មានការអភិវឌ្ឍន៍រីកចម្រើន ហើយបច្ចុប្បន្នគម្រោងនេះកំពុងសិក្សាប្លង់បញ្ចប់ រួចនឹងធ្វើការដាក់អោយដេញថ្លៃសាងសង់ក្នុងពេលឆាប់ៗខាងមុខនេះ នេះជាការលើកឡើងរបស់ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះជួយស្រុកក្រគរ និងស្រុកកណ្តៀង ដែលជាអ្នកផ្តួចផ្តើមក្នុងការកសាងបង្កើតមជ្ឈមណ្ឌលនេះឡើង។
ទីតាំងសម្រាប់សាងសង់មជ្ឈមណ្ឌលពហុកីឡដ្ឋាននេះ បានឈូសឆាយចាក់ដីរួចរាល់ហើយ ដោយក្នុងគម្រោងរួមមានការសាងសង់ទីលានបាល់ទាត់ខ្នាតអន្តរជាតិ, ទីលានមហោស្រព,ទីលានបាល់ទះ, បាល់បោះ, ទីលានរត់ប្រណាំង, ទីលានវាយសី, កន្លែងអង្គុយទស្សនា, កន្លែងហាត់ប្រាណ, សួនច្បារ, កន្លែងក្មេងលេង, កន្លែងអង្គុយលេង, ស្រះទឹក និងកន្លែងចតរថយន្តជាដើម៕
អត្ថបទ៖ ខេត្តពោធិ៍សាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
