អាជ្ញាធរ បានឲ្យដឹងនៅថ្ងៃចន្ទ (ទី២៣ ខែមីនា ឆ្នាំ២០២៦) នេះ មានមនុស្សយ៉ាងហោចណាស់ចំនួន ៥នាក់ ស្លាប់នៅក្នុងប្រទេសអូម៉ង់ ក្នុងរយៈពេល ២៤ម៉ោងកន្លងមកនេះ បន្ទាប់ពីរថយន្តត្រូវបានខ្សែទឹកជំនន់ហូរនាំទៅ។

អាជ្ញាធរការពារស៊ីវិល និងរថយន្តសង្គ្រោះបន្ទាន់របស់អូម៉ង់ បានឲ្យដឹងថា មនុស្ស ៧នាក់ត្រូវបានជួយសង្គ្រោះ បន្ទាប់ពីរថយន្ត ១គ្រឿង ដែលដឹកមនុស្ស ១០នាក់ ត្រូវបានទឹកហូរនាំទៅ នៅវាលទំនាបមួយ ក្នុងតំបន់ Wilayat នៃទីក្រុង Barka ខណៈដែល ៣នាក់ផ្សេងទៀត ត្រូវបានរកឃើញស្លាប់នៅពេលក្រោយមក។

នៅក្នុងឧប្បត្តិហេតុដាច់ដោយឡែកមួយ ពលរដ្ឋ ២នាក់ បានបាត់បង់ជីវិត បន្ទាប់ពីរថយន្តរបស់ពួកគេត្រូវបានទឹកជំនន់ហូរនាំទៅ នៅឯវាលទំនាបមួយ ក្នុងតំបន់ Wilayat នៃខេត្ត Al-Maawil ដោយសាកសពរបស់ពួកគេ ត្រូវបានរកឃើញនៅពេលក្រោយ។

អាជ្ញាធរបានបញ្ជាក់ថា ការស្លាប់នេះបានកើតឡើងនៅពេលដែលភ្លៀងធ្លាក់ខ្លាំង បានប៉ះពាល់ដល់តំបន់មួយចំនួននៃប្រទេសនេះ។

គួរបញ្ជាក់ថា ប្រទេសអូម៉ង់បានជួបប្រទះនឹងទឹកជំនន់ដ៏អាក្រក់ ក្នុងរយៈពេលប៉ុន្មានឆ្នាំចុងក្រោយនេះ ក្នុងនោះរួមទាំងនៅក្នុងខែមេសា ឆ្នាំ២០២៤ នៅពេលដែលទឹកជំនន់យ៉ាងគំហុកភ្លាមៗ បានឆក់យកជីវិតមនុស្សយ៉ាងហោចណាស់ ២០នាក់ និងជន់លិចតំបន់ធំៗជាច្រើន៕