នាវាដឹកប្រេងរឹបអូសបានកាលពីថ្ងៃសុក្រសប្តាហ៍មុនដោយអាជ្ញាធរបារាំងដែលលោកប្រធានាធិបតី Emmanuel Macron ជារបស់កងនាវាស្រមោលរុស្ស៊ីនោះ បានធ្វើដំណើរទៅដល់ជិតទីក្រុងភាគខាងត្បូង Marseille របស់បារាំងនាថ្ងៃចន្ទនេះ ។

កងទ័ពជើងទឹកបារាំង បានរឹបអូសនាវាដឹកប្រេង Deyna ដោតទង់ជាតិម៉ូសំប៊ីក ដែលត្រូវបានគេសង្ស័យថាដោតទង់ជាតិក្លែងក្លាយ ក្រោយត្រូវបានគេផ្តល់អត្តសញ្ញាណថាជារបស់បណ្តាញនាវាស្រមោលដែលជំរុញឲ្យទីក្រុងមូស្គូនាំចេញប្រេង បើទោះបីជារងទណ្ឌកម្មលោកខាងលិចក៏ដោយ ។ នាវានេះ បានធ្វើដំណើរចេញពីកំពង់ផែ Murmansk របស់រុស្ស៊ី ។

នាវា Deyna បានចូលចតជិតកំពង់ផែ Marseille-Fos នាថ្ងៃចន្ទនេះ ខណៈទូកនគរបាលល្បាតវា ។

ទណ្ឌកម្មលោកខាងលិច បានដាក់លើរុស្ស៊ី សម្រាប់ការវាយលុកអ៊ុយក្រែន ហើយនិងមានគោលដៅកាត់បន្ថយប្រាក់ចំណូលពីប្រេងរបស់ពួកគេ នាំឲ្យកើនឡើងចំនួនកងនាវាដឹកប្រេងស្រមោល ជួយឲ្យទីក្រុងមូស្គូបន្តលំហូរប្រេងឆៅរបស់ខ្លួន ។

ស្របពេលដែលទណ្ឌកម្មអឺរ៉ុបនៅតែចូលជាធរមាន សហរដ្ឋអាមេរិក បានបន្ធូរបន្ថយទណ្ឌកម្មបណ្តោះអាសន្នលើការលក់ប្រេងរុស្ស៊ី ស្របពេលសង្រ្គាមមជ្ឈិមបូព៌ា ធ្វើឲ្យអាក់ខានការផ្គត់ផ្គង់ប្រេង ហើយនិងការហក់ឡើងខ្ពស់តម្លៃប្រេង ៕