ការវាយប្រហាររបស់អ៊ីស្រាអែល ទៅលើតំបន់ជាយក្រុងភាគខាងត្បូងទីក្រុងបេរូត កាលពីថ្ងៃចន្ទ ទី២៣ ខែមីនា ជាការវាយប្រហារលើកដំបូងលើទីតាំងលាក់ខ្លួនរបស់ក្រុមហេសបូឡាក្នុងរយៈពេលប៉ុន្មានថ្ងៃនេះ ខណៈយោធាបាននិយាយថា បានចាប់ខ្លួនសមាជិកពីរនាក់នៃក្រុមដែលគាំទ្រដោយអ៊ីរ៉ង់ នៅភាគខាងត្បូងប្រទេសលីបង់។ ការវាយប្រហាររបស់អ៊ីស្រាអែលនៅពេលដំបូង បានធ្លាក់ទៅលើតំបន់ Hazmieh ដែលភាគច្រើនជាអ្នកកាន់សាសនាគ្រិស្តនៅជិតទីក្រុងបេរូត ដោយអ៊ីស្រាអែលនិយាយថា បានកំណត់គោលដៅលើសមាជិកនៃកងប្រតិបត្តិការបរទេសរបស់ឆ្មាំបដិវត្តន៍អ៊ីរ៉ង់។

យោធាអ៊ីស្រាអែលបានប្រកាសថា ខ្លួនកំពុង «វាយប្រហារហេដ្ឋារចនាសម្ព័ន្ធរបស់ក្រុមហេសបូឡានៅក្នុងទីក្រុងបេរូត» បន្ទាប់ពីបានអំពាវនាវឱ្យប្រជាជនចាកចេញពីតំបន់ជាយក្រុងភាគខាងត្បូងជាមុន។ប្រទេសលីបង់ ត្រូវបានទាញឲ្យធ្លាក់ចូលទៅក្នុងសង្គ្រាមនៅមជ្ឈិមបូព៌ា នៅពេលដែលក្រុមហេសបូឡា បានចាប់ផ្តើមបាញ់រ៉ូក្កែតចូលទៅក្នុងប្រទេសអ៊ីស្រាអែលនៅថ្ងៃទី២ ខែមីនា ដើម្បីសងសឹកចំពោះការសម្លាប់មេដឹកនាំកំពូលរបស់អ៊ីរ៉ង់ លោក Ayatollah Ali Khamenei ក្នុងការវាយប្រហាររបស់អ៊ីស្រាអែលនិងអាមេរិក។ ចាប់តាំងពីពេលនោះមក អ៊ីស្រាអែលបានបើកការវាយប្រហារនៅទូទាំងប្រទេសលីបង់ ដោយបានសម្លាប់មនុស្សយ៉ាងហោចណាស់ ១.០៣៩ នាក់ និងបានបញ្ជូនកងទ័ពជើងគោកទៅកាន់ភាគខាងត្បូងប្រទេស។

នៅក្នុងសេចក្តីថ្លែងការណ៍មួយកាលពីថ្ងៃចន្ទ កងទ័ពអ៊ីស្រាអែលបាននិយាយថា «ក្នុងអំឡុងពេលសកម្មភាពមួយដើម្បីកំណត់ទីតាំងអាវុធនៅភាគខាងត្បូងប្រទេសលីបង់ កងទ័ពអ៊ីស្រាអែល បានកំណត់អត្តសញ្ញាណភេរវករកងកម្លាំង Radwan ហេសបូឡាប្រដាប់អាវុធជាច្រើននាក់ ដែលកំពុងមានផែនការបាញ់មីស៊ីលប្រឆាំងរថក្រោះ។ កងកម្លាំងរក្សាសន្តិភាពអង្គការសហប្រជាជាតិនៅលីបង់ (UNIFIL) បានប្រកាសកាលពីថ្ងៃចន្ទថា ទីស្នាក់ការកណ្តាលរបស់ខ្លួននៅទីក្រុង Naqura ត្រូវបានវាយប្រហារដោយគ្រាប់ផ្លោង ដែលទំនងជាបាញ់ដោយ «អង្គភាពគ្មានរដ្ឋ»។