កាលពីថ្ងៃចន្ទ (២៣ មីនា) លោកប្រធានាធិបតីអ៊ុយក្រែន Volodymyr Zelenskyy បាននិយាយថា ភ្នាក់ងារចារកម្មសម្ងាត់យោធារបស់អ៊ុយក្រែន មានភស្តុតាង «ដែលមិនអាចប្រកែកបានឡើយ» ថា រុស្ស៊ីនៅតែបន្តផ្តល់ព័ត៌មានសម្ងាត់ឱ្យដល់ប្រទេសអ៊ីរ៉ង់ ហើយសកម្មភាពបែបនេះ អាចត្រឹមតែអូសបន្លាយសង្គ្រាមដ៏ក្ដៅគគុកនៅមជ្ឈិមបូព៌ាប៉ុណ្ណោះ។

លោក Zelenskyy បានបង្ហោះសារលើបណ្តាញសង្គម X បន្ទាប់ពីជំនួបជាមួយប្រធានភ្នាក់ងារសម្ងាត់យោធាអ៊ុយក្រែនថា៖ «រុស្ស៊ីកំពុងប្រើប្រាស់សមត្ថភាពចារកម្មផ្ដល់សញ្ញា និងប្រព័ន្ធអេឡិចត្រូនិកចារកម្មផ្ទាល់ខ្លួន ក៏ដូចជាផ្នែកខ្លះនៃទិន្នន័យដែលទទួលបានតាមរយៈកិច្ចសហប្រតិបត្តិការជាមួយបណ្ដាដៃគូនៅមជ្ឈិមបូព៌ា»។

ក្នុងសុន្ទរកថាវីដេអូពេលយប់របស់ខ្លួន លោក Zelenskyy បានបន្តថា៖ «មានភស្តុតាងកាន់តែច្រើនឡើងៗ» អំពីកិច្ចប្រឹងប្រែងបន្តបន្ទាប់របស់រុស្ស៊ី ក្នុងការបញ្ជូនចារកម្មសម្ងាត់ទៅឱ្យអ៊ីរ៉ង់។ លោកបន្ថែមថា៖ «ទីផ្សារបាននិងកំពុងមានប្រតិកម្មអវិជ្ជមានរួចទៅហើយ ហើយបញ្ហានេះកំពុងធ្វើឱ្យស្ថានភាពប្រេងឥន្ធនៈក្នុងប្រទេសជាច្រើនមានភាពស្មុគស្មាញយ៉ាងខ្លាំង។ តាមរយៈការជួយរបបដឹកនាំអ៊ីរ៉ង់ឱ្យបន្តរស់រាន និងអាចវាយប្រហារបានកាន់តែត្រឹមត្រូវ រុស្ស៊ីគឺច្បាស់ណាស់ថាកំពុងអូសបន្លាយសង្គ្រាម»។

រុស្ស៊ី ធ្លាប់បានចេញមុខបដិសេធរួចទៅហើយជុំវិញបញ្ហានេះ។ កាលពីសប្តាហ៍មុន វិមានក្រឹមឡាំងបានច្រានចោលរបាយការណ៍របស់កាសែតអាមេរិក Wall Street Journal ដែលថា រុស្ស៊ីបានចែករំលែករូបភាពពីផ្កាយរណប និងបច្ចេកវិទ្យាដ្រូនដែលត្រូវបានកែលម្អទៅឱ្យអ៊ីរ៉ង់ ដោយហៅរបាយការណ៍នោះថាជា «ព័ត៌មានក្លែងក្លាយ»៕