រថយន្តគិលានសង្គ្រោះបានដឹកទាហានដែលរងរបួសទៅកាន់មន្ទីរពេទ្យយោធាមួយកន្លែងក្នុងទីក្រុង Bogota កាលពីថ្ងៃចន្ទ ទី ២៣ ខែមីនា បន្ទាប់ពីយន្តហោះកងទ័ពអាកាសរបស់ប្រទេសកូឡុំប៊ីដែលដឹកមនុស្ស ១២៥ នាក់ បានធ្លាក់ភ្លាមៗបន្ទាប់ពីហោះឡើងនៅតំបន់អាម៉ាហ្សូនភាគខាងត្បូងប្រទេស។

អាជ្ញាធរនិយាយថា មនុស្សយ៉ាងហោចណាស់ ៣៤ នាក់បានស្លាប់ និង៧៧នាក់ផ្សេងទៀតរងរបួស នៅពេលដែលយន្តហោះ Hercules C-130 ផលិតដោយក្រុមហ៊ុន Lockheed Martin បានធ្លាក់នៅចម្ងាយត្រឹមតែមួយគីឡូម៉ែត្រកន្លះពីផ្លូវរត់នៅទីក្រុង Puerto Leguizamo ជិតព្រំដែនជាមួយប្រទេសប៉េរូ។

យោងតាមអាជ្ញាធរបានឲ្យដឹងថា យន្តហោះនេះកំពុងដឹកជញ្ជូនកងទ័ព នៅពេលនោះបានធ្លាក់ ហើយគ្រាប់រំសេវនៅលើយន្តហោះបានផ្ទុះដោយសារតែមានអគ្គិភ័យបន្ទាប់ពីការបុកទង្គិច។

អាជ្ញាធរតំបន់របស់ប្រទេសកូឡុំប៊ីបានបញ្ជាក់ពីចំនួនអ្នកស្លាប់ ខណៈកិច្ចខិតខំប្រឹងប្រែងជួយសង្គ្រោះ និងជម្លៀសនៅបន្ត។ ទាហានដែលរងរបួស ត្រូវបានដឹកតាមយន្តហោះចេញពីកន្លែងធ្លាក់ មុនពេលត្រូវបានផ្ទេរទៅកាន់រថយន្តគិលានសង្គ្រោះដែលកំពុងរង់ចាំនៅក្នុងរដ្ឋធានី។

រដ្ឋមន្ត្រីក្រសួងការពារជាតិ លោក Pedro Sánchez បាននិយាយនៅលើបណ្តាញ X ថា វាជា «គ្រោះថ្នាក់ដ៏សោកសៅ» បានកើតឡើងនៅក្រុង Puerto Leguizamo ជាក្រុងដាច់ស្រយាលមួយនៅក្នុងខេត្ត Putumayo នៃតំបន់អាម៉ាហ្សូន មានព្រំប្រទល់ជាប់នឹងប្រទេសជិតខាងអាមេរិកខាងត្បូង គឺប្រទេសប៉េរូ និងអេក្វាឌ័រ។