សារព័ត៌មានរដ្ឋ KCNA បានរាយការណ៍នៅថ្ងៃអង្គារ២៤ មីនានេះថា មេដឹកនាំកូរ៉េខាងជើង លោក Kim Jong Un បាននិយាយថា ប្រទេសរបស់លោកនឹងពង្រឹងកងកម្លាំងនុយក្លេអ៊ែររបស់ខ្លួនជាអចិន្ត្រៃយ៍ និងចាត់ទុកកូរ៉េខាងត្បូងថាជារដ្ឋដែលមានអរិភាពបំផុតរបស់ខ្លួន ខណៈលោកបានកំណត់អាទិភាពគោលនយោបាយនៅក្នុងសុន្ទរកថាមួយទៅកាន់សភា ។

ប្រព័ន្ធផ្សព្វផ្សាយរដ្ឋ KCNA បានរាយការណ៍កាលពីថ្ងៃចន្ទដើមសប្ដាហ៍នេះថា លោក Kim ត្រូវបានតែងតាំងជាប្រធានកិច្ចការរដ្ឋឡើងវិញ បន្ទាប់ពីប្រទេសនេះបានបើកសម័យប្រជុំលើកដំបូងនៃសភាប្រជាជនកំពូលរបស់ខ្លួនកាលពីថ្ងៃអាទិត្យកន្លងទៅ។

លោក Kim និយាយថា ឋានៈរបស់ទីក្រុងព្យុងយ៉ាង ជារដ្ឋមានអាវុធនុយក្លេអ៊ែរគឺ មិនអាចកែប្រែបានឡើយ ហើយការពង្រីកឆ័ត្រនុយក្លេអ៊ែរការពារខ្លួន គឺមានសារៈសំខាន់ចំពោះសន្តិសុខជាតិ ស្ថិរភាពតំបន់ និងការអភិវឌ្ឍសេដ្ឋកិច្ច។

លោកបានបដិសេធគំនិតដែលថា ការរំសាយអាវុធនុយក្លេអ៊ែរអាចត្រូវបានដោះដូរសម្រាប់អត្ថប្រយោជន៍សេដ្ឋកិច្ច ឬការធានាសន្តិសុខ បាន ដោយនិយាយថា កូរ៉េខាងជើងបានបង្ហាញរួចហើយថា ការរក្សាកងកម្លាំងនុយក្លេអ៊ែរ ខណៈបន្តការអភិវឌ្ឍ គឺជាជម្រើសយុទ្ធសាស្ត្រដ៏ត្រឹមត្រូវ។

លោកបានថ្លែងនៅក្នុងសុន្ទរកថាកាលពីថ្ងៃចន្ទទៅកាន់សភាប្រជាជនកំពូល ដែលជាស្ថាប័ននីតិប្បញ្ញត្តិរបស់ប្រទេសកុម្មុយនិស្តមួយនេះថា អាវុធនុយក្លែអ៊ែរ បានជួយកុំឲ្យមានសង្គ្រាម និងអនុញ្ញាតឲ្យរដ្ឋផ្ដោតលើធនធានស្ដីពីកំណើនសេដ្ឋកិច្ច ការកសាងប្រទេស និងជីវភាពរស់នៅរបស់ប្រជាជន។

មេដឹកនាំកំពូលវ័យក្មេងរបស់កូរ៉េខាងជើងរូបនេះ បានចោទប្រកាន់អាមេរិក និងសម្ព័ន្ធមិត្តរបស់ខ្លួនថា បានធ្វើឲ្យតំបន់នេះអស្ថិរភាព ដោយការដាក់ពង្រាយអាវុធនុយក្លេអ៊ែរយុទ្ធសាស្ត្រនៅជិតឧបទ្វីបកូរ៉េ ប៉ុន្តែបាននិយាយថា កូរ៉េខាងជើងលែងចាត់ទុកខ្លួនឯងថាជាប្រទេសដែលស្ថិតនៅក្រោមការគំរាមកំហែងទៀតហើយ ហើយមានអំណាចគំរាមកំហែងប្រទេសដទៃប្រសិនបើចាំបាច់៕