អ្នកធ្វើដំណើរតាមផ្លូវអាកាសនៅទូទាំងរដ្ឋញូវយ៉ក និងស្ទើរតែទូទាំងសហរដ្ឋអាមេរិកទាំងមូល បានជួបប្រទះការរំខានដល់ជើងហោះហើរកាលពីថ្ងៃចន្ទ (២៣ មីនា) បន្ទាប់ពីឧប្បត្តិហេតុដ៏អាក្រក់មួយបានកើតឡើងនៅអាកាសយានដ្ឋាន LaGuardia (LGA) ក្នុងទីក្រុងញូវយ៉ក កាលពីយប់ថ្ងៃអាទិត្យកន្លងទៅ ដែលបណ្ដាលឱ្យអាកាសយានិក ២រូប បាត់បង់ជីវិត។ មជ្ឈមណ្ឌលដឹកជញ្ជូនដ៏សំខាន់នេះត្រូវបានបិទបណ្ដោះអាសន្ន ប៉ុន្តែបានបើកឡើងវិញនៅរសៀលថ្ងៃចន្ទ។

ប្រព័ន្ធផ្សព្វផ្សាយក្នុងស្រុករាយការណ៍ថា នៅម៉ោងក្នុងស្រុកប្រហែល ១១:៤៥យប់ថ្ងៃអាទិត្យ យន្តហោះតំបន់មួយគ្រឿងប្រភេទ CRJ-900 របស់ដៃគូក្រុមហ៊ុនអាកាសចរណ៍កាណាដា Air Canada បានបុកជាមួយរថយន្តពន្លត់អគ្គីភ័យមួយគ្រឿងដែលកំពុងឆ្លងកាត់ផ្លូវរត់ បន្ទាប់ពីរថយន្តនោះទទួលបានការអនុញ្ញាតឱ្យទៅពិនិត្យមើលយន្តហោះមួយគ្រឿងផ្សេងទៀត ដែលរាយការណ៍ពីក្លិនស្អុយ។

វីដេអូកាមេរ៉ាសុវត្ថិភាពបានបង្ហាញឱ្យឃើញថា យន្តហោះ CRJ-900 ដែលកំពុងចុះចត និងរថយន្តពន្លត់អគ្គិភ័យ បានបើកបរក្នុងពេលដំណាលគ្នា ហើយក៏បានបុកគ្នានៅចំណុចប្រសព្វមួយ។ អាកាសយានិកទីមួយ និងសហអាកាសយានិក បានស្លាប់ក្នុងគ្រោះថ្នាក់នេះ ហើយមនុស្សប្រហែល ៤០នាក់បានរងរបួស ដែលរួមមានទាំងអ្នកដំណើរ និងបុគ្គលិក។

មុនពេលប៉ះទង្គិចគ្នា ទិន្នន័យគ្រប់គ្រងចរាចរណ៍ផ្លូវអាកាសបង្ហាញថា បុគ្គលិកគ្រប់គ្រងម្នាក់បាននិយាយក្នុងប្រព័ន្ធទំនាក់ទំនងរបស់អាកាសយានដ្ឋាន ទាំងភ័យស្លន់ស្លោ និងប្រាប់រថយន្តពន្លត់អគ្គិភ័យនោះឱ្យ «ឈប់» ម្តងហើយម្តងទៀត។ យន្តហោះនោះគឺជាជើងហោះហើររបស់ក្រុមហ៊ុន Jazz Aviation ដែលជាដៃគូរបស់ Air Canada ហើយកំពុងដឹកអ្នកដំណើរប្រហែល ៧០នាក់ និងបុគ្គលិក ៤នាក់នៅលើយន្តហោះ មកពីទីក្រុង Montreal របស់កាណាដា។ ក្រុមប្រឹក្សាសុវត្ថិភាពដឹកជញ្ជូនជាតិរបស់អាមេរិក កំពុងស៊ើបអង្កេត៕