របាយការណ៍ស្រាវជ្រាវដែលចេញផ្សាយនៅថ្ងៃអង្គារ (២៤ មីនា) នេះបង្ហាញថា ប៉ាគីស្ថានត្រូវបានចាត់ថ្នាក់ថាជាប្រទេសដែលមានផ្សែងអ័ព្ទពុលក្នុងបរិយាកាសខ្លាំងជាងគេបំផុតនៅលើពិភពលោកក្នុងឆ្នាំ២០២៥ ដោយមានកម្រិតកំហាប់ភាគល្អិតតូចៗដ៏គ្រោះថ្នាក់ ដែលគេហៅថាកំហាប់ភាគល្អិតនិចល PM2.5 ខ្ពស់ជាងកម្រិតដែលអង្គការសុខភាពពិភពលោក (WHO) បានណែនាំរហូតដល់ទៅ ១៣ ដង។

ស្ថាប័នត្រួតពិនិត្យគុណភាពខ្យល់របស់ស្វីស IQAir បានលើកឡើងក្នុងរបាយការណ៍ប្រចាំឆ្នាំរបស់ខ្លួនថា មានតែប្រទេសនិងដែនដីចំនួន ១៣ ប៉ុណ្ណោះ ដែលបានរក្សាកម្រិតមធ្យមនៃ PM2.5 ឱ្យស្ថិតក្នុងស្តង់ដារបស់ WHO ពោលគឺតិចជាង ៥ មីក្រូក្រាមក្នុងមួយម៉ែត្រគូប កាលពីឆ្នាំមុន ដែលចំនួននេះមានការកើនឡើងបើធៀបនឹងឆ្នាំ២០២៤។

សរុបមក មានប្រទេសនិងដែនដីចំនួន ១៣០ ក្នុងចំណោម ១៤៣ ដែលមិនអាចអនុវត្តតាមគោលការណ៍ណែនាំគុណភាពខ្យល់របស់ WHO។ បង់ក្លាដែស និងតាហ្ស៊ីគីស្ថាន ជាប់ចំណាត់ថ្នាក់ទី២ និងទី៣ រៀងគ្នាក្នុងបញ្ជីប្រទេសដែលមានការបំពុលខ្យល់ខ្លាំងបំផុត។ ចំណែកឯប្រទេសឆាដ ដែលតាមស្ថិតិ ជាប្រទេសមានផ្សែងអ័ព្ទពុលខ្លាំងបំផុតក្នុងឆ្នាំ២០២៤ បានធ្លាក់មកជាប់ចំណាត់ថ្នាក់ទី៤ ក្នុងឆ្នាំ ២០២៥ ប៉ុន្តែការធ្លាក់ចុះនៃកំហាប់ PM2.5 កាលពីឆ្នាំមុននេះ ទំនងជាមកពីការខ្វះចន្លោះនៃទិន្នន័យ។

របាយការណ៍បន្តថា ទីក្រុង Loni របស់ឥណ្ឌា គឺជាទីក្រុងដែលមានការបំពុលខ្យល់ខ្លាំងបំផុតក្នុងពិភពលោកនៅឆ្នាំ២០២៥។ ជារួម មានតែ ១៤% ប៉ុណ្ណោះនៃទីក្រុងជុំវិញពិភពលោក ដែលសម្រេចតាមស្តង់ដា WHO ក្នុងឆ្នាំ២០២៥ ដែលចំនួននេះបានថយចុះពី ១៧% កាលពីឆ្នាំមុន ដោយសារតែបញ្ហាចំហេះព្រៃនៅកាណាដា បានធ្វើឱ្យកម្រិត PM2.5 កើនឡើងនៅទូទាំងសហរដ្ឋអាមេរិក និងរីករាលដាលដល់តំបន់អឺរ៉ុបផងដែរ៕