​រុស្ស៊ី៖ អ្នកនាំពាក្យ​វិមាន​ក្រឹម​ឡាំង​លោក Dmitry Peskov បាន​ប្រាប់​ក្រុម​អ្នកសារព័ត៌មាន​កាលពី​ថ្ងៃ​អង្គា​រថា ការ​ប្រើ​វោហារសាស្ត្រ​ផ្ទាល់ខ្លួន​របស់​លោក​ប្រធានាធិបតី​អាមេរិក Joe Biden ទៅកាន់​សម​ភាគី​រុស្ស៊ី​របស់​លោក​គឺ​លោក Vladimir Putin បាន​ជះ​ផល​អវិជ្ជមាន​ដល់​ទំនាក់ទំនង​រវាង​ប្រទេស​ទាំង​២ ប៉ុន្តែ​ការសន្ទនា​រវាង​ក្រុង ​Moscow ​និងក្រុង​ Washington​ គឺ​មាន​ការចាំបាច់​ក្នុង​ចំណុច​មួយ​ចំនួន វា​ជា​ផលប្រយោជន៍​សម្រាប់​ពិភពលោក​ទាំងមូល។​

​អ្នកនាំពាក្យ​វិមាន​ក្រឹម​ឡាំង​រូប​នេះ​បាន​និយាយ​ថា ការ​ប្រមាថកាតទាន​រឿង​ផ្ទាល់ខ្លួន មិន​អាច​ជួយ​អ្វី​បាន​ក្រៅ​តែ​ពី​ធ្វើ​ឲ្យ​មានផល​ប៉ះពាល់​ដល់​ទំនាក់ទំនង​រវាង​ប្រមុខរដ្ឋ​ទាំង​២​។ ​ជាពិសេស​ការ​និយាយ​ប្រមាថ​រឿង​ផ្ទាល់ខ្លួន ដែល​មិន​គួរ​បណ្ដោយ​ឲ្យ​មាន​សង្គ្រាម​វោហារសាស្ត្រ​កើត​មាន​ទាល់តែសោះ​រវាង​ប្រមុខរដ្ឋ​ទាំង​២​។ ពិត​ណាស់​ថា ​កត្តា​នេះ​បាន​បង្ក​ឲ្យ​មានការ​ប៉ះពាល់​ជា​អវិជ្ជមាន​។ ជាង​នេះ​ទៅទៀត​នោះ លោក Peskov បាន​បន្ថែម​ថា ការសន្ទនា​រវាង​រុស្ស៊ី និង​សហរដ្ឋអាមេរិក​ពិតជា​ចាំបាច់​ក្នុង​ករណី​ខ្លះ​។ ​ម្យ៉ាងទៀត​មិន​ត្រឹមតែ​ចាំបាច់​សម្រាប់​ប្រទេស​ទាំង​ ២​ នោះ​ប៉ុណ្ណោះ​ទេ ថែមទាំង​សម្រាប់​ផលប្រយោជន៍​ពិភពលោក​ផង​ដែរ​។

​ចំណែក​សហរដ្ឋអាមេរិក​វិញ ប្រធាន​ផ្នែក​ទំនាក់ទំនង​ប្រចាំ​សេត​វិមាន​លោកស្រី Kate Bedingfield បាន​ប្រាប់​ក្រុម​អ្នកសារព័ត៌មាន​កាលពី​ថ្ងៃ​អង្គា​រថា ជំនួប​រវាង​លោក​ប្រធានាធិបតី​រុស្ស៊ី Vladimir Putin និង​សម​ភាគី​អាមេរិក​លោក Joe Biden នឹង​កើតឡើងបន្ទាប់ពី​ជម្លោះ​ក្នុង​ប្រទេស​អ៊ុយ​ក្រែ​ន​ធូរស្បើយ​ហើយ​នោះ​៕

អត្ថបទ៖ សុខមាន