ប្រភពមួយនៅក្នុងចលនានេះ បានប្រាប់សារព័ត៌មានន TASS កាលពីថ្ងៃចន្ទថា ចលនាឧទ្ទាម Ansar Allah (ក្រុមហ៊ួទី) នៅប្រទេសយេម៉ែន មិនដែលចេញសេចក្តីថ្លែងការណ៍ផ្លូវការទាក់ទងនឹងចេតនារបស់ខ្លួន ក្នុងការបើកការវាយប្រហារលើនាវាកងទ័ពជើងទឹកអាមេរិក នៅក្នុងសមុទ្រក្រហម ដើម្បីគាំទ្រអ៊ីរ៉ង់នោះទេ។ 

ប្រភពរបស់ទីភ្នាក់ងារនេះ បាននិយាយជាការឆ្លើយតបទៅនឹងសំណើរបស់សារព័ត៌មាន TASS ដើម្បីធ្វើអត្ថាធិប្បាយលើព័ត៌មានដែលទើបតែចែកចាយថ្មីៗនេះ នៅលើវេទិកាបណ្តាញសង្គម និងប្រព័ន្ធផ្សព្វផ្សាយមួយចំនួន ដែលក្រុមហ៊ួទីបានប្រកាសជាផ្លូវការថា ពួកគេកំពុងចូលរួមក្នុងសង្គ្រាម ដើម្បីគាំទ្រអ៊ីរ៉ង់ និងធ្វើការវាយប្រហារលើនាវាចម្បាំងអាមេរិក នៅក្នុងសមុទ្រក្រហម។

ប្រភពបានបន្ថែមថា ការបោះពុម្ពផ្សាយបែបនេះ គឺជារឿងមិនពិត។

នៅថ្ងៃទី ១៤ ខែមីនា សមាជិកម្នាក់នៃការិយាល័យនយោបាយរបស់ចលនា Ansar Allah គឺលោក Mohammed al-Bukheiti បាននិយាយថា ចលនានេះ បានបង្កើតការសម្របសម្រួលជាមួយទីក្រុងតេអេរ៉ង់ ហើយការសម្រេចចិត្តលើការគាំទ្រផ្នែកយោធាដែលអាចធ្វើទៅបានសម្រាប់អ៊ីរ៉ង់ នឹងត្រូវបានប្រកាសនៅពេលវេលាសមស្របមួយ។

នៅថ្ងៃទី ១៥ ខែមីនា សមាជិកម្នាក់នៃក្រុមយោធាដែលបង្កើតឡើងដោយក្រុមហ៊ួទី គឺលោក Abed al-Thawr បានចេញការគំរាមកំហែងថា ប្រសិនបើការសម្រេចចិត្តមួយ ត្រូវបានធ្វើឡើង ដើម្បីធ្វើអន្តរាគមន៍ វិធានការចម្បងអាចជាការប្រកាសជាផ្លូវការអំពីការបិទផ្លូវទឹករបស់សហរដ្ឋអាមេរិក និងអ៊ីស្រាអែល ក៏ដូចជាការបិទច្រកសមុទ្រ Bab el-Mandeb ទាំងស្រុងសម្រាប់នាវាទាំងអស់ដែលធ្វើដំណើរទៅកាន់កំពង់ផែអ៊ីស្រាអែល៕