អតីតរដ្ឋមន្ត្រីក្រសួងការពារជាតិអាមេរិក ក្នុងអាណត្តិទីមួយរបស់លោកប្រធានាធិបតី Donald Trump បាននិយាយកាលពីថ្ងៃចន្ទ (២៣ មីនា) ថា ប្រសិនបើអាមេរិក បញ្ឈប់សង្គ្រាមប្រឆាំងនឹងអ៊ីរ៉ង់នៅពេលនេះ គឺប្រៀបបាននឹងការប្រគល់ការគ្រប់គ្រងច្រកសមុទ្រហ័រមូស ដែលជាចំណុចយុទ្ធសាស្ត្រដឹកជញ្ជូនថាមពលដ៏សំខាន់ ទៅឱ្យទីក្រុងតេអេរ៉ង់ទាំងស្រុង។

ការវាយតម្លៃរបស់លោក Jim Mattis ធ្វើឡើងបន្ទាប់ពីលោក Trump បានប្រកាសផ្អាកវាយប្រហារលើហេដ្ឋារចនាសម្ព័ន្ធថាមពលអ៊ីរ៉ង់ រយៈពេល ៥ ថ្ងៃ ខណៈប្រតិបត្តិការយោធារួមគ្នារវាងអាមេរិក និងអ៊ីស្រាអែល ប្រឆាំងនឹងអ៊ីរ៉ង់ បានឈានចូលដល់សប្តាហ៍ទី៤ គិតចាប់តាំងពីថ្ងៃទី២៨ ខែកុម្ភៈមក។ ការសងសឹករបស់អ៊ីរ៉ង់ បានបង្ខំឱ្យបិទច្រកសមុទ្រហ័រមូស ជាទីដែលការផ្គត់ផ្គង់ប្រេង និងឧស្ម័នរបស់ពិភពលោកចំនួន ២០% ឆ្លងកាត់ពីមជ្ឈិមបូព៌ា ទៅកាន់ទីផ្សារអន្តរជាតិ។

លោក Mattis បានលើកឡើងក្នុងសន្និសីទមួយថា៖ «នៅពេលនេះ ប្រសិនបើអាមេរិកប្រកាសជ័យជម្នះ អ៊ីរ៉ង់នឹងនិយាយថា ពួកគេគឺជាម្ចាស់កម្មសិទ្ធិលើច្រកសមុទ្រហ័រមូស។ បន្ទាប់មក គ្រប់គ្នានឹងឃើញមានការយកពន្ធលើរាល់នាវាដែលឆ្លងកាត់ទីនោះ»។ លោកបន្ថែមថា៖ ទោះបីជាមានការផ្អាកវាយប្រហារក៏ដោយ ក៏ការស្វែងរកដំណោះស្រាយល្អមួយពីអាមេរិក ឬអ៊ីរ៉ង់ មិនមែនជារឿងងាយនោះទេ»។

របាយការណ៍និយាយថា នាយកប្រតិបត្តិក្រុមហ៊ុនប្រេងមួយចំនួនបានចាប់ផ្តើមមានគំនិតឱ្យអាមេរិក បង្កើតវត្តមានយោធាអចិន្ត្រៃយ៍នៅច្រកសមុទ្រហ័រមូស ដើម្បីលុបបំបាត់សមត្ថភាពរបស់អ៊ីរ៉ង់ ក្នុងការវាយប្រហារលើនាវាដឹកប្រេង ប៉ុន្តែពួកគេភ្ញាក់ផ្អើលជាខ្លាំង នៅពេលលោក Trump បង្ហើបពីការចាប់ផ្តើមចរចាជាមួយរបបដឹកនាំអ៊ីរ៉ង់៕