អភិបាលតំបន់គ្រីមៀលើកបន្តុបដោយរុស្ស៊ីលោក Mikhail Razvozhayev និយាយនៅថ្ងៃអង្គារនេះថា មនុស្ស ២នាក់ បានស្លាប់ និងមនុស្សយ៉ាងហោច ១០នាក់ផ្សេងទៀត រងរបួស ក្រោយហេតុការណ៍ផ្ទុះក្នុងអគារស្នាក់នៅ ស្ថិតក្នុងទីក្រុងកំពង់ផែ Sevastopol ។ មូលហេតុបណ្តាលឲ្យមានហេតុការណ៍ផ្ទុះកើតឡើង គេនៅពុំទាន់ដឹងច្បាស់ភ្លាមៗនោះទេ ។

រូបភាពវីដេអូឃ្លីបចុះផ្សាយដោយក្រសួងសង្រ្គោះបន្ទាន់រុស្ស៊ី ឃើញអគារបាក់មួយផ្នែក រថយន្តរងការឆាបឆេះ ហើយបង្អួចបែកបាក់ ។

លោក Razvozhayev និយាយថា ប្លុកអគារផ្ទះល្វែងជិតគ្នា ៣ខ្នង រងការខូចខាតផងដែរ ហើយអ្នកស្រុក ត្រូវបានជម្លៀសចេញ ។

លោកបន្តថា ក្រុមអាជ្ញាធរ ច្រានចោលចំពោះទស្សនៈថា វាគឺជាករណីផ្ទុះហ្គាសនៅក្នុងអគារផ្ទះល្វែងមួយខ្នង ។

ខណៈពេលនោះដែរ គណៈកម្មាធិការស៊ើបអង្កេតរុស្ស៊ីនិយាយថា វាគឺជាករណីឧក្រិដ្ឋកម្ម ប៉ុន្តែពួកគេពុំបានផ្តល់រឿងរ៉ាវលម្អិតពីឧបទ្ទេវហេតុមួយនេះឡើយ ។

សូមបញ្ជាក់ថា រុស្ស៊ី បានដាក់បញ្ចូលតំបន់គ្រីមៀជាឧបសម្ព័ន្ធរបស់ខ្លួនកាលពីឆ្នាំ ២០១៤ ហើយបច្ចុប្បន្នពួកគេចាត់ទុកឧបទ្វីបនៅក្នុងសមុទ្រខ្មៅមួយនេះ ថាជាផ្នែកដ៏សំខាន់មួយនៃទឹកដីរបស់ខ្លួន បើទោះបីជាប្រទេសភាគច្រើននៅលើពិភពលោក ចាត់ទុកដែនដីមួយនេះ ថាជាផ្នែកមួយរបស់អ៊ុយក្រែនក៏ដោយ ៕