អ្នកជំនាញអង្គការសហប្រជាជាតិ (UN) ម្នាក់ លើកឡើងថា ពិភពលោកបានផ្តល់ «អាជ្ញាប័ណ្ណ» ដល់អ៊ីស្រាអែលឲ្យធ្វើទារុណកម្មដល់ប្រជាជនប៉ាឡេស្ទីន ដោយជីវិតនៅក្នុងដែនដីកាន់កាប់ប៉ាឡេស្ទីន «បន្តរងទុក្ខវេទនា ទាំងផ្នែករាងកាយ និងផ្លូវចិត្ត»។

លោកស្រី Francesca Albanese អ្នករាយការណ៍ពិសេសរបស់ UN ស្តីពីស្ថានភាពសិទ្ធិមនុស្ស នៅក្នុងដែនដីប៉ាឡេស្ទីនដែលត្រូវបានកាន់កាប់ចាប់តាំងពីឆ្នាំ១៩៦៧ បាននិយាយកាលពីថ្ងៃចន្ទ (ទី២៣ ខែមីនា ឆ្នាំ២០២៦) ថា «ការធ្វើទារុណកម្មបានក្លាយជាគោលនយោបាយរដ្ឋយ៉ាងមានប្រសិទ្ធភាព» នៅក្នុងប្រទេសអ៊ីស្រាអែល។

លោកស្រីបានបន្តថា៖ «អ៊ីស្រាអែលទទួលបានសិទ្ធិអំណាចធ្វើទារុណកម្មប្រជាជនប៉ាឡេស្ទីនយ៉ាងមានប្រសិទ្ធភាព ពីព្រោះរដ្ឋាភិបាលភាគច្រើនរបស់អ្នក រដ្ឋមន្ត្រីរបស់អ្នក បានអនុញ្ញាតឲ្យមានទង្វើនោះ» ខណៈពេលដែលលោកស្រី បានបង្ហាញរបាយការណ៍ចុងក្រោយរបស់លោកស្រីទៅកាន់ក្រុមប្រឹក្សាសិទ្ធិមនុស្ស UN។

ក្នុងរបាយការណ៍ដែលមានចំណងជើងថា «ការធ្វើទារុណកម្ម និងប្រល័យពូជសាសន៍» លោកស្រី Albanese បានលើកឡើងថា «អ្វីដែលធ្លាប់តែធ្វើដោយលួចលាក់ ឥឡូវនេះ ត្រូវបានអនុវត្តយ៉ាងបើកចំហ ដោយបង្កើតបានរបបនៃភាពអាម៉ាស់ជាប្រព័ន្ធ ការឈឺចាប់ និងការមិនផ្ដល់តម្លៃ ដែលត្រូវបានអនុញ្ញាតនៅកម្រិតនយោបាយខ្ពស់បំផុត»។

របាយការណ៍នេះបានគូសបញ្ជាក់ពី «ការធ្វើទារុណកម្មមិនបានកំណត់ ចំពោះបន្ទប់ឃុំឃាំង និងបន្ទប់សួរចម្លើយ»។ លោកស្រី Albanese គឺជាអ្នករិះគន់បើកចំហ ចំពោះវិធានការរបស់អ៊ីស្រាអែល នៅក្នុងតំបន់កាន់កាប់ West Bank និងសង្គ្រាមប្រល័យពូជសាសន៍របស់ប្រទេសនេះ លើតំបន់ហ្កាហ្សា។ លោកស្រីបានប្រឈមនឹងប្រតិកម្មពីអ៊ីស្រាអែល និងសហរដ្ឋអាមេរិក ដោយមានការអំពាវនាវខ្លាំងឡើងៗឲ្យដកលោកស្រីចេញពីតំណែងជាអ្នករាយការណ៍ពិសេសនេះ។

ចាប់តាំងពីថ្ងៃទី៧ ខែតុលា ឆ្នាំ២០២៣ ការវាយប្រហាររបស់អ៊ីស្រាអែលលើតំបន់ហ្កាហ្សា បានសម្លាប់មនុស្សយ៉ាងហោចណាស់ ៧២.២៦៣នាក់ និងបង្កឲ្យមានរបួស ១៧១.៩៤៤នាក់ផ្សេងទៀត។ នេះបើយោងតាមតួលេខរបស់អាជ្ញាធរសុខាភិបាលតំបន់ហ្កាហ្សា៕