ក្រុមហ៊ុនអាកាសចរណ៍វៀតណាម (Vietnam Airlines) នឹងផ្អាកជើងហោះហើរជាបណ្តោះអាសន្នលើផ្លុវហោះហើរ ក្នុងស្រុកមួយចំនួន ដោយសារកង្វះខាតប្រេងឥន្ធនៈយន្តហោះ និងការកើនឡើងនូវតម្លៃប្រេងឥន្ធនៈ ដែលបណ្តាលមកពីជម្លោះនៅតំបន់មជ្ឈិមបូព៌ា ជាការចាប់ផ្តើមប៉ះពាល់ដល់ការធ្វើដំណើរតាមផ្លូវអាកាសរបស់ប្រទេស។

យោងតាមសេចក្តីថ្លែងការណ៍មួយពីអាជ្ញាធរអាកាសចរណ៍ស៊ីវិលវៀតណាម បានឲ្យដឹងថា ក្រុមហ៊ុនអាកាសចរណ៍ជាតិមួយនេះ នឹងកាត់បន្ថយជើងហោះហើរប្រហែល ២៣ជើង ក្នុងមួយសប្តាហ៍ ចាប់ពីថ្ងៃទី ១ ខែមេសា ឆ្នាំ២០២៦ នេះ ដោយសារតែការផ្គត់ផ្គង់ប្រេងឥន្ធនៈយន្តហោះមានការរឹតត្បិត។

យោងតាមកាលវិភាគនៅលើគេហទំព័រកក់សំបុត្ររបស់ក្រុមហ៊ុន VietJet Aviation JSC បានបង្ហាញថា ក្រុមហ៊ុនអាកាសចរណ៍មួយនេះ ក៏កំពុងកាត់បន្ថយជើងហោះហើរ លើផ្លូវហោះហើរមួយចំនួនផងដែរ។ ចំណែកក្រុមហ៊ុនអាកាសចរណ៍ Bamboo Airways បានឲ្យដឹងនៅក្នុងសេចក្ដីថ្លែងការណ៍ថា នឹងប្រឹងប្រែងបន្តរក្សាជើងហោះហើរ ក្នុងអំឡុងពេលមានការធ្វើដំណើរដ៏មមាញឹកខ្លាំង តែភាពទៀងទាត់អាចទាបជាងឆ្នាំ២០២៥ ប្រសិនបើតម្លៃប្រេងនៅតែខ្ពស់ដដែលនោះ។ 

ជាមួយគ្នានេះ ក្រុមហ៊ុនក៏បានអំពាវនាវឲ្យរដ្ឋាភិបាលផ្តល់ការគាំទ្របន្ថែមដល់ក្រុមហ៊ុនអាកាសចរណ៍ ក្នុងនោះរួមទាំងការកាត់បន្ថយពន្ធការពារបរិស្ថាន និងពន្ធប្រេងឥន្ធនៈយន្តហោះបន្ថែមទៀត។

គួរបញ្ជាក់ថា ប្រទេសវៀតណាមបានចាត់វិធានការ ដើម្បីពង្រឹងសន្តិសុខថាមពល បន្ទាប់ពីសង្គ្រាមអ៊ីរ៉ង់ ស្ទើរតែបានបញ្ឈប់ការនាំចេញប្រេង និងឧស្ម័ន តាមរយៈច្រកសមុទ្រ Hormuz ដែលនាំឲ្យតម្លៃប្រេងឥន្ធនៈហក់ឡើងខ្លាំង និងបង្កឲ្យមានការតម្រង់ជួរយ៉ាងវែង នៅតាមស្ថានីយប្រេងឥន្ធនៈ៕