កាលពីថ្ងៃចន្ទម្សិលមិញ កេនយ៉ា ចាប់ផ្តើមដឹកជញ្ជូនផលិតផលកសិកម្មលើកដំបូងរបស់ខ្លួនទៅកាន់ប្រទេសចិន ក្រោមកិច្ចព្រមព្រៀងពុំគិតពន្ធថ្មី នៅក្នុងដំណើរវិវត្តន៍មួយដែលពួកគេសង្ឃឹមថា នឹងជំរុញការនាំចេញ និងពង្រឹងទំនាក់ទំនងជាមួយប្រទេសមហាអំណាចសេដ្ឋកិច្ចធំបំផុតទី ២របស់ពិភពលោកមួយនេះ ។

អនុប្រធានាធិបតីកេនយ៉ាលោក Kithure Kindiki បានចូលរួមជាមួយអនុប្រធានាធិបតីចិនលោក Han Zheng ពេលដែលពួកគេចាប់ផ្តើមការចាកចេញទំនិញ ដែលត្រូវបានដឹកជញ្ជូនតាមផ្លូវរថភ្លើង មុនពេលដឹកជញ្ជូនទៅកាន់ប្រទេសចិន ។

ព្រឹត្តការណ៍នេះដែរ បានកើតមានឡើង បន្ទាប់ពីសេចក្តីប្រកាសរបស់ប្រធានាធិបតីចិនលោក Xi Jinping កាលពីខែមុនថា ចិននឹងអនុញ្ញាតពន្ធសេរ៉ូទាំងស្រុងសម្រាប់ការនាំចូលពីបណ្តាប្រទេសអាហ្វ្រិកចំនួន ៥៣ ដែលមានទំនាក់ទំនងការទូតជាមួយទីក្រុងប៉េកាំង ចាប់ផ្តើមពីថ្ងៃទី ១ ខែឧសភា ឆ្នាំ ២០២៦ ខាងមុខនេះតទៅ ។

លោក Han និយាយនៅក្នុងពិធីនោះថា កាលពីខែមុន លោកប្រធានាធិបតី Xi Jinping បានប្រកាសថា ចិននឹងចាប់ផ្តើមអនុវត្តទាំងស្រុងពន្ធសេរ៉ូសម្រាប់ប្រទេសចំនួន ៥៣នៅអាហ្វ្រិក ដែលមានទំនាក់ទំនងការទូតជាមួយទីក្រុងប៉េកាំង ចាប់ផ្តើមពីថ្ងៃទី ១ ខែឧសភា ឆ្នាំ ២០២៦ ។

ការដឹកជញ្ជូនដែលរួមបញ្ចូលទាំងទំនិញកសិកម្មនេះ គឺជាផ្នែកមួយនៃកិច្ចខិតខំប្រឹងប្រែងទាញយកប្រយោជន៍ពីទីផ្សារអ្នកប្រើប្រាស់ដ៏ធំទូលាយរបស់ចិន ហើយនិងកាត់បន្ថយឱនភាពពាណិជ្ជកម្មរបស់កេនយ៉ា ជាមួយប្រទេសនៅអាស៊ីមួយនេះ ។

ចិន ស្ថិតក្នុងចំណោមដៃគូពាណិជ្ជកម្មធំបំផុតរបស់កេនយ៉ា ហើយនិងជាប្រភពដ៏សំខាន់នៃហិរញ្ញប្បទានសម្រាប់គម្រោងហេដ្ឋារចនាសម្ព័ន្ធ រួមទាំងផ្លូវរថភ្លើង និងផ្លូវជាតិ ។

គំនិតផ្តួចផ្តើមពុំគិតពន្ធនេះដែរ ត្រូវបានគេរំពឹងថា នឹងផ្តល់ឱកាសឲ្យប្រជាកសិករ និងក្រុមហ៊ុននាំចេញកេនយ៉ា បង្កើនការចូលដល់ទីផ្សារចិន ជាពិសេសសម្រាប់ផលិតផលកសិកម្មដូចជា តៃ កាហ្វេ ផ្លែបឺរ និងផលិតផលអាហារស្រស់ ៕