កុមារ នៅទូទាំងតំបន់មជ្ឈិមបូព៌ា កំពុងប្រឈមនឹង «ផលវិបាកដ៏ធ្ងន់ធ្ងរ» ចាប់តាំងពីសង្គ្រាមរបស់សហរដ្ឋអាមេរិក-អ៊ីស្រាអែល ជាមួយអ៊ីរ៉ង់ បានចាប់ផ្តើមកាលពីខែមុន។ នេះបើយោងតាមការព្រមានរបស់មន្ត្រីជាន់ខ្ពស់ម្នាក់ នៅអង្គការយូនីសេហ្វ (UNICEF) កាលពីថ្ងៃចន្ទ (ទី២៣ ខែមីនា ឆ្នាំ២០២៦)។

នាយករងទទួលបន្ទុកសកម្មភាពមនុស្សធម៌ និងប្រតិបត្តិការផ្គត់ផ្គង់របស់អង្គការ UNICEF លោក Ted Chaiban បានប្រាប់អ្នកសារព័ត៌មាននៅទីក្រុង New York សហរដ្ឋអាមេរិកថា៖ «រយៈពេល ២៣ថ្ងៃ នៅក្នុងជម្លោះដែលកំពុងឡើងកម្ដៅ នៅមជ្ឈិមបូព៌ា កុមារនៅទូទាំងតំបន់នេះ កំពុងជួបប្រទះនឹងផលវិបាកយ៉ាងធ្ងន់ធ្ងរ។ ស្ថានភាព អាក្រក់បន្ថែមទៀត នៅក្នុងជម្លោះដែលកាន់តែរីករាល ឬអូសបន្លាយនេះ នឹងជាគ្រោះមហន្តរាយ សម្រាប់មនុស្សរាប់លាននាក់ទៀត»។

លោក Chaiban បានបន្ថែមថា កុមារជាង ២.១០០នាក់ ត្រូវបានសម្លាប់ ឬរងរបួស ក្នុងនោះរួមទាំងកុមារ ២០៦នាក់ ត្រូវបានសម្លាប់នៅក្នុងប្រទេសអ៊ីរ៉ង់ និង ១១៨នាក់ នៅក្នុងប្រទេសលីបង់។ ជាមួយគ្នានេះ លោកក៏បានព្រមានប្រឆាំងនឹងការផ្លាស់ទីលំនៅយ៉ាងឆាប់រហ័ស នៅទូទាំងប្រទេសជាច្រើន ដែលបណ្តាលមកពីការទម្លាក់គ្រាប់បែកឥតឈប់ឈរ និងបទបញ្ជាជម្លៀស។

នៅក្នុងប្រទេសអ៊ីរ៉ង់ លោកបានប្រាប់ថា ទីភ្នាក់ងារជនភៀសខ្លួនអង្គការសហប្រជាជាតិ (UNHCR) ប៉ាន់ប្រមាណថា មនុស្សរហូតដល់ ៣,២លាននាក់ ត្រូវបានផ្លាស់ទីលំនៅ រួមទាំងកុមាររហូតដល់ ៨៦៤.០០០នាក់។

ការកើនឡើងនូវភាពតានតឹង ក្នុងតំបន់ បានបន្តក្ដៅគគុក ចាប់តាំងពីសហរដ្ឋអាមេរិក និងអ៊ីស្រាអែល បានបើកការវាយលុករួមគ្នាលើអ៊ីរ៉ង់ កាលពីថ្ងៃទី២៨ ខែកុម្ភៈ ដោយបានសម្លាប់មនុស្សជាង ១.៣៤០នាក់ រហូតមកដល់ពេលនេះ ក្នុងនោះរួមមានទាំងមេដឹកនាំកំពូល លោក Ayatollah Ali Khamenei ផងដែរ៕