នៅក្នុងរូបភាពវីដេអូឃ្លីបដែលបានបញ្ចេញកាលពីថ្ងៃចន្ទ អ៊ីរ៉ង់បានសច្ចាក្នុងចិត្តថា នឹងប្រើប្រាស់គ្រប់មធ្យោបាយដែលមានទាំងអស់ ដើម្បីការពារសន្តិសុខនៅតំបន់ឈូងសមុទ្រពែរ្ស ។

លោក Ebrahim Zolfaqari គឺជាអ្នកនាំពាក្យទីស្នាក់ការកណ្តាលបញ្ជាការយោធា Khatam Al-Anbiya របស់ទីក្រុងតេអេរ៉ង់ និយាយថា ប្រទេសក្រៅតំបន់គ្មានសិទ្ធិជ្រៀតជ្រែកចូលសន្តិសុខក្នុងដែនសមុទ្រនោះឡើយ ។

លោក Zolfaqari បន្តថា អ៊ីរ៉ង់កំពុងអនុវត្តការគ្រប់គ្រងយុទ្ធសាស្រ្តលើច្រកសមុទ្រ Hormuz ។ អ៊ីរ៉ង់បានបិទច្រកសមុទ្រ Hormuz ដោយប្រសិទ្ធិភាព ដែលជាដែនទឹកសម្រាប់លំហូរ ១ភាគ ៥នៃប្រេង និងឧស្ម័នធម្មជាតិរាវសកល ។

ប្រធានាធិបតីសហរដ្ឋអាមេរិកលោក Donald Trumpបានទាមទារឲ្យអ៊ីរ៉ង់បើកច្រកសមុទ្រមួយនេះឡើងវិញ ប៉ុន្តែទីក្រុងតេអេរ៉ង់ និយាយថា ពួកគេនឹងមិនបើកនោះទេ រហូតដល់សហរដ្ឋអាមេរិក និងអ៊ីស្រាអែលបញ្ឈប់ការវាយប្រហារពួកគេ ៕