ក្រុមការងារជួយសង្រ្គោះអឌ្ឍចន្ទក្រហមអ៊ីរ៉ង់ ត្រូវបានគេមើលឃើញកំពុងធ្វើការនៅទីតាំងកើតហេតុដែលគេរាយការណ៍ថា បានរងការវាយប្រហារតាមច្រកអាកាសនៅទីក្រុងតេអេរ៉ង់ ។

រូបភាពដែលបញ្ចេញដោយក្រុមអឌ្ឍចន្ទក្រហមអ៊ីរ៉ង់ ឃើញក្រុមសង្រ្គោះបន្ទាន់ និងរថយន្តពន្លត់អគ្គិភ័យ នៅកន្លែងកើតហេតុ ខណៈក្រុមការងារ បានជួយអ្នករស់រាននៅកណ្តាលកម្ទេចកម្ទីរាយប៉ាយ ។

កងកម្លាំងការពារជាតិអ៊ីស្រាអែលនិយាយនៅថ្ងៃអង្គារនេះថា ពួកគេបានបើកការវាយប្រហារលើគោលដៅអ៊ីរ៉ង់ជាង ៣ពាន់កន្លែង ចាប់តាំងពីការចាប់ផ្តើមប្រតិបត្តិការយោធារួមគ្នារបស់សហរដ្ឋអាមេរិក-អ៊ីស្រាអែល កាលពីថ្ងៃទី ២៨ ខែកុម្ភៈ ។

ខណៈពេលនោះដែរ អារ៉ាប៊ីសាអ៊ូឌីត បារ៉ែន និងគូវ៉ែត បានបាយការណ៍ពីការវាយប្រហារថ្មីរបស់អ៊ីរ៉ង់កាលពីយប់រហូតដល់ព្រឹកថ្ងៃអង្គារនេះ ។

ក្រសួងការពារជាតិអារ៉ាប៊ីសាអ៊ូឌីត និយាយនៅក្នុងសារបង្ហោះលើបណ្តាញព័ត៌មានសង្គម Xថា កងកម្លាំងរបស់ខ្លួន បានបាញ់ស្កាត់យានដ្រូនអ៊ីរ៉ង់យ៉ាងហោច ២៧គ្រឿង ។

ដោយឡែក កងកម្លាំងប្រដាប់អាវុធគូវ៉ែត និយាយដែរថា ប្រព័ន្ធដែនអាកាសរបស់ខ្លួន បានចូលរួមបាញ់ស្កាត់មីស៊ីលអរិភាព និងយានដ្រូនដែលបានបំពានដែនអាកាសរបស់ពួកគេ នៅព្រឹកថ្ងៃអង្គារនេះ ។

គួរឲ្យដឹងថា មនុស្សជាង ២ពាន់នាក់ ត្រូវបានសម្លាប់ នៅក្នុងសង្រ្គាមជាមួយសហរដ្ឋអាមេរិក និងអ៊ីស្រាអែល ដែលបានបើកការវាយប្រហារកាលពីថ្ងៃទី ២៨ ខែកុម្ភៈ ដែលបានធ្វើឲ្យទីផ្សារពិភពលោកប្រែប្រួល ធ្វើឲ្យតម្លៃប្រេងហក់ឡើងខ្ពស់ បង្កើនក្តីបារម្ភអតិផរណាសកល និងធ្វើឲ្យរង្គោះរង្គើដល់សម្ព័ន្ធមិត្តលោកខាងលិច ៕