ប្រព័ន្ធផ្សព្វផ្សាយក្នុងស្រុក បានរាយការណ៍នៅថ្ងៃអង្គារ (ទី២៤ ខែមីនា ឆ្នាំ២០២៦) នេះថា ស្ថានីយប្រេងឥន្ធនៈរាប់រយទីតាំង នៅក្នុងប្រទេសអូស្ត្រាលី បានចាប់ផ្ដើមអស់ស្តុក ទាំងប្រេងសាំង ឬប្រេងម៉ាស៊ូត ទោះបីជារដ្ឋមន្ត្រីអូស្ត្រាលីធានាដល់សាធារណជនថា ទីផ្សារត្រូវបានផ្គត់ផ្គង់យ៉ាងល្អប្រសើរក៏ដោយ។

នៅថ្ងៃទី២៤ ខែមីនានេះ សារព័ត៌មាន The Sydney Morning Herald បានចុះផ្សាយថា New South Wales ជារដ្ឋដែលមានប្រជាជនច្រើនបំផុតរបស់អូស្ត្រាលីនោះ មានស្ថានីយចំនួន ១៦៥ទីតាំងគ្មានប្រេងម៉ាស៊ូត និង ២៩៨ទីតាំងគ្មានប្រេងសាំងយ៉ាងហោចណាស់ក៏មួយប្រភេទដែរ ខណៈដែលអ្នកប្រើប្រាស់នាំគ្នាទិញក្នុងបរិមាណដ៏ច្រើន ក្នុងអំឡុងពេលមានសង្គ្រាមដែលកំពុងបន្ត រវាងអាមេរិក-អ៊ីស្រាអែល ជាមួយអ៊ីរ៉ង់។

រដ្ឋមន្ត្រីក្រសួងថាមពល លោក Chris Bowen បានអះអាងទៅកាន់សភាថា ស្ថានីយប្រេងសាំង នៅក្នុងរដ្ឋជាច្រើន កំពុងប្រឈមនឹងការខ្វះខាត។ ហើយនៅថ្ងៃទី២៤ ខែមីនានេះ លោក Bowen ក៏បានដាក់ចេញនូវការបន្ធូរបន្ថយស្តង់ដារប្រេងឥន្ធនៈមួយផ្សេងទៀត ដែលនឹងអនុញ្ញាតឲ្យប្រេងម៉ាស៊ូតកាន់តែច្រើនចូលទៅក្នុងទីផ្សារ បន្ទាប់ពីបានទម្លាក់ស្តង់ដារស្ពាន់ធ័រ នៅមុននេះ។

លោក Bowen បានតែងតាំងក្រុមការងារពិសសផ្គត់ផ្គង់ប្រេងឥន្ធនៈ ដែលបានជួបប្រជុំគ្នាជាលើកដំបូងនៅថ្ងៃទី២៤ ខែមីនា ដោយមានបេសកកម្មធ្វើយ៉ាងនាធានាឲ្យបានថា ការផ្គត់ផ្គង់បានទៅដល់តំបន់ជនបទដែលត្រូវការចាំបាច់។ រដ្ឋាភិបាលក៏បានបញ្ចេញប្រេងឥន្ធនៈពីការស្ដុកបម្រុងរបស់ខ្លួនផងដែរ ហើយមានប្រេងម៉ាស៊ូតស្ដុកទុករយៈពេល ៣០ថ្ងៃ៕