យោងតាមកំណត់ចំណាំមួយដែលបានឃើញដោយសារព័ត៌មានរ៉យទ័រកាលពីថ្ងៃអង្គារ (២៤ មីនា) អ៊ីរ៉ង់បានប្រាប់ទៅកាន់ក្រុមប្រឹក្សាសន្តិសុខអង្គការសហប្រជាជាតិ និងអង្គការសមុទ្រអន្តរជាតិថា នាវា «មិនមែនអរិភាព» ឬ «នាវាដែលមិនមែនជាសត្រូវ» អាចនឹងឆ្លងកាត់ច្រកសមុទ្រហ័រមូសបាន ប្រសិនបើពួកគេសម្របសម្រួលជាមួយអាជ្ញាធរអ៊ីរ៉ង់។

សង្គ្រាមរវាងសហរដ្ឋអាមេរិក និងអ៊ីស្រាអែល ប្រឆាំងនឹងអ៊ីរ៉ង់ ស្ទើរតែបានបញ្ឈប់ទាំងស្រុងនូវការដឹកជញ្ជូនប្រេងប្រហែលមួយភាគប្រាំនៃពិភពលោក និងឧស្ម័នធម្មជាតិរាវឆ្លងកាត់ច្រកសមុទ្រនេះ ដែលបណ្តាលឱ្យមានការរំខានដល់ការផ្គត់ផ្គង់ប្រេងទូទាំងពិភពលោក។

កំណត់ចំណាំពីក្រសួងការបរទេសអ៊ីរ៉ង់ ត្រូវបានផ្ញើទៅកាន់ក្រុមប្រឹក្សាសន្តិសុខដែលមានសមាជិក ១៥រូប និងទៅកាន់អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃអាទិត្យកន្លងទៅ។ បន្ទាប់មក ខ្លឹមសារកំណត់ចំណាំត្រូវបានចែកចាយនៅថ្ងៃអង្គារ ទិ២៤ ខែមីនា ក្នុងចំណោមសមាជិក ១៧៦ប្រទេស នៃទីភ្នាក់ងារដឹកជញ្ជូនរបស់អង្គការសហប្រជាជាតិ ដែលមានមូលដ្ឋាននៅទីក្រុងឡុងដ្រ៍ ដែលទទួលខុសត្រូវក្នុងការគ្រប់គ្រងសុវត្ថិភាព និងសន្តិសុខនៃការដឹកជញ្ជូនអន្តរជាតិ និងការការពារការបំពុលបរិស្ថាន។

កំណត់ចំណានោះនិយាយថា «នាវាទាំងឡាយណាដែលមិនមែនអរិភាព រួមទាំងនាវាដែលជាកម្មសិទ្ធិ ឬជាប់ពាក់ព័ន្ធនឹងរដ្ឋដទៃទៀត អាចទទួលបានអត្ថប្រយោជន៍ពីការឆ្លងកាត់ប្រកបដោយសុវត្ថិភាពតាមរយៈច្រកសមុទ្រហ័រមូស ដោយមានការសម្របសម្រួលជាមួយអាជ្ញាធរមានសមត្ថកិច្ចរបស់អ៊ីរ៉ង់ ដរាបណានាវាទាំងនោះមិនចូលរួម ឬគាំទ្រសកម្មភាពឈ្លានពានប្រឆាំងនឹងអ៊ីរ៉ង់ និងគោរពតាមបទប្បញ្ញត្តិសុវត្ថិភាព និងសន្តិសុខដែលបានប្រកាសយ៉ាងពេញលេញ»៕