រុស្ស៊ី បានធ្វើការវាយប្រហារតាមអាកាសធំបំផុតមួយចាប់តាំងពីការចាប់ផ្តើមសង្គ្រាមរបស់ខ្លួនលើប្រទេសអ៊ុយក្រែន ដោយបានបង្ហោះយានដ្រូនចំនួន៩៤៨គ្រឿងក្នុងរយៈពេល ២៤ ម៉ោង ខណៈខ្លួនបានបញ្ជូនកងទ័ព និងយុទ្ធោបករណ៍ទៅកាន់សមរភូមិមុខ ជាអ្វីដែលទំនងជាការចាប់ផ្តើមការវាយលុកថ្មីរបស់ខ្លួន។

យោងតាមអាជ្ញាធរតំបន់បានឲ្យដឹងថា ការវាយប្រហារពេលថ្ងៃដ៏កម្រកាលពីថ្ងៃអង្គារបានសម្លាប់មនុស្ស៣នាក់នៅក្នុងទីក្រុង Ivano-Frankivsk ភាគខាងលិចប្រទេសអ៊ុយក្រែន និងមនុស្សម្នាក់នៅក្នុងតំបន់ Vinnytsia។ នៅក្នុងទីក្រុង Lviv វីដេអូដែលត្រូវបានបង្ហោះតាមអនឡាញបានបង្ហាញយានដ្រូនមួយគ្រឿងបានធ្លាក់ទៅលើអគារចាស់មួយកន្លែងនៅជាប់នឹងព្រះវិហារមួយនៅក្នុងមជ្ឈមណ្ឌលប្រវត្តិសាស្ត្របណ្តាលឲ្យមនុស្ស២២នាក់រងរបួស។

អភិបាលក្រុង Lviv លោក Maksym Kozytskyi បាននិយាយថា ផ្នែកមួយនៃតំបន់បេតិកភណ្ឌពិភពលោករបស់អង្គការយូណេស្កូ នៅជុំវិញព្រះវិហារ St Andrew’s សតវត្សរ៍ទី ១៧ បានរងការខូចខាត។ នាយករដ្ឋមន្ត្រី Yulia Svyrydenko បានសរសេរនៅលើបណ្តាញ X ថា «រុស្ស៊ីកំពុងវាយប្រហារមជ្ឈមណ្ឌលទីក្រុងដ៏មមាញឹកមួយនៅពេលព្រឹកព្រលឹម» ។ ការវាយប្រហារទាំងនេះ កើតឡើងបន្ទាប់ពីការបាញ់ផ្លោងកាលពីពេលយប់នៅទូទាំងតំបន់ចំនួន ១១កន្លែង ដែលបានសម្លាប់មនុស្សប្រាំនាក់។

ប្រធានាធិបតីអ៊ុយក្រែន Volodymyr Zelenskyy បានចេញសេចក្តីអំពាវនាវថ្មីមួយសម្រាប់សម្ព័ន្ធមិត្តឱ្យផ្គត់ផ្គង់គ្រាប់រំសេវការពារដែនអាកាសដល់ទីក្រុងគីវ ដោយព្រមានថា ទីក្រុងគីវ ដែលពឹងផ្អែកលើសហរដ្ឋអាមេរិកសម្រាប់ប្រព័ន្ធការពារដែនអាកាសប្រឆាំងមីស៊ីលបាលីស្ទីក នឹងប្រឈមកង្វះមីស៊ីល ខណៈទីក្រុងវ៉ាស៊ីនតោនកំពុងផ្តោតលើសង្គ្រាមរបស់អាមេរិក-អ៊ីស្រាអែល លើប្រទេសអ៊ីរ៉ង់។