ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃអង្គារ ទី២៤ ខែមីនា ថា អ៊ីរ៉ង់ បានធ្វើសម្បទានដ៏សំខាន់ទាក់ទងនឹងថាមពលដល់សហរដ្ឋអាមេរិក ដោយចាត់ទុកថា វាជាការវិវឌ្ឍវិជ្ជមាន ទោះបីជាលោកមិនបានផ្តល់ព័ត៌មានលម្អិតក៏ដោយ។

លោក Trump បានលើកឡើងថា អំណោយនេះទាក់ទងនឹងច្រកសមុទ្រ Hormuz ជាផ្លូវទឹកដឹកជញ្ជូនប្រេងដែលសហរដ្ឋអាមេរិកបានទប់ទល់ដើម្បីរក្សាឱ្យនៅបើកចំហ។ លោក Trump បានប្រាប់អ្នកសារព័ត៌មាននៅក្នុងការិយាល័យពងក្រពើ (Oval Office) ថា «ពួកគេ បានផ្តល់ឱ្យយើងនូវអំណោយ ហើយអំណោយបានទទួលនៅថ្ងៃនេះ វាជាអំណោយដ៏ធំអស្ចារ្យ មានតម្លៃជាប្រាក់យ៉ាងច្រើន»។

«វាពុំមែនជានុយក្លេអ៊ែរទេ វាទាក់ទងនឹងប្រេងនិងឧស្ម័ន ហើយវាជារឿងល្អណាស់ដែលពួកគេបានធ្វើ»។ លោក Trump បញ្ជាក់ជាថ្មីម្តងទៀតថា លោកគិតថាសហរដ្ឋអាមេរិកបានឈ្នះសង្គ្រាមរួចហើយ ដោយបានបង្ហាញថា រដ្ឋមន្ត្រីក្រសួងការពារជាតិ លោក Pete Hegseth មានការខកចិត្តចំពោះរបៀបដែលយុទ្ធនាការនេះបានដំណើរការទៅលឿនពេក។ 

លោក Trump បាននិយាយថា សហរដ្ឋអាមេរិកកំពុងចរចាជាមួយ «មនុស្សត្រឹមត្រូវ» នៅក្នុងប្រទេសអ៊ីរ៉ង់ ដើម្បីឈានដល់កិច្ចព្រមព្រៀងមួយក្នុងការបញ្ចប់អរិភាព ហើយប្រជាជនអ៊ីរ៉ង់ចង់ឈានដល់កិច្ចព្រមព្រៀងនេះយ៉ាងខ្លាំង។ លោកបាននិយាយថា «យើងស្ថិតក្នុងការចរចានៅពេលនេះ» លើបញ្ហាអ៊ីរ៉ង់ ជាពិសេសថាតើបេសកជនអាមេរិក លោក Steve Witkoff និង លោក Jared Kushner មានផែនការនឹងចរចានៅសប្តាហ៍នេះ ឬយ៉ាងណា។ លោកបាននិយាយថា លោក Witkoff លោកKushner អនុប្រធានាធិបតី លោក JD Vance និងរដ្ឋមន្ត្រីការបរទេស លោក Marco Rubio ពាក់ព័ន្ធក្នុងកិច្ចចរចា ហើយប្រទេសប៉ាគីស្ថានបាននិយាយថា ខ្លួនមានឆន្ទៈក្នុងការធ្វើជាម្ចាស់ផ្ទះនៃកិច្ចចរចារវាងសហរដ្ឋអាមេរិក និងអ៊ីរ៉ង់។