ភាពតានតឹងកាន់តែខ្លាំងនៅមជ្ឈិមបូព៌ាបន្ទាប់ពីការប្រឈមដាក់គ្នាខាងយោធាថ្មីៗនេះ រវាងអាមេរិក អ៊ីស្រាអែល និងអ៊ីរ៉ង់ កំពុងបង្កើនការព្រួយបារម្ភនៅទូទាំងទ្វីបអឺរ៉ុប អំពីហានិភ័យនៃវិបត្តិជនភៀសខ្លួនថ្មី។

កាលពីថ្ងៃអង្គារ ២៤មីនាសប្ដាហ៍នេះ អង្គការទេសន្តរប្រវេសន៍អន្តរជាតិ (IOM) ដែលជាទីភ្នាក់ងារអន្តោប្រវេសន៍របស់អង្គការសហប្រជាជាតិ បាននិយាយថា មនុស្សជាង១៣០.០០០ នាក់បានឆ្លងចូលទៅក្នុងប្រទេសស៊ីរី និងមនុស្សជាង១លាននាក់ត្រូវបានរត់ចោលផ្ទះសម្បែងនៅក្នុងប្រទេសលីបង់ចាប់តាំងពីដើមខែមីនា ដោយសារការវាយប្រហារឥតឈប់ឈរពីអ៊ីស្រាអែល។

ទោះបីជាការធ្វើអន្តោប្រវេសន៍ទ្រង់ទ្រាយធំទៅកាន់ទ្វីបអឺរ៉ុបមិនទាន់កើតឡើងក៏ដោយ ទីភ្នាក់ងារនេះបានព្រមានថា លក្ខខណ្ឌសម្រាប់ការផ្លាស់ទីលំនៅកាន់តែទូលំទូលាយមានរួចហើយនៅក្នុងតំបន់ដែលរងផលប៉ះពាល់ជាយូរមកហើយដោយសារជម្លោះ។

លោក Johan Forssell រដ្ឋមន្ត្រីក្រសួងអន្តោប្រវេសន៍ស៊ុយអែតបានប្រាប់សារព័ត៌មាន Euronews កាលពីដើមខែនេះថា ពុំមានសញ្ញាណាមួយ នៃការកើនឡើងចំនួនជនភៀសខ្លួនទៅកាន់ទ្វីបអឺរ៉ុបនោះទេ ប៉ុន្តែ អ្វីៗអាចផ្លាស់ប្តូរយ៉ាងឆាប់រហ័ស។

អនុរដ្ឋមន្ត្រីក្រសួងអន្តោប្រវេសន៍របស់ប្រទេសកោះ ស៊ីប លោក Nicholas Ioannides បានព្រមានកាលពីថ្ងៃទី១៣ ខែមីនាថាសហភាពអឺរ៉ុបមិនអាចមើលរំលងលទ្ធភាពនៃវិបត្តិជនភៀសខ្លួនថ្មីបានទេ។

បណ្ដាមេដឹកនាំសហភាពអឺរ៉ុបក៏បានសង្កត់ធ្ងន់លើការប្រុងប្រយ័ត្នផងដែរ ទោះជម្លោះនេះពុំទាន់បានបង្កឲ្យមានលំហូរចំណាកស្រុកភ្លាមៗទៅកាន់សហភាពអឺរ៉ុបក៏ដោយ នេះបើយោងតាមការសន្និដ្ឋានដែលបានអនុម័តបន្ទាប់ពីកិច្ចប្រជុំក្រុមប្រឹក្សាអឺរ៉ុប។ដោយផ្អែកលើមេរៀនពីវិបត្តិអន្តោប្រវេសន៍ឆ្នាំ ២០១៥ នៅពេលជនភៀសខ្លួន និងជនអន្តោប្រវេសន៍ជាង១ លាននាក់បានចូលទៅក្នុងទឹកដីទ្វីបអឺរ៉ុប សហភាពអឺរ៉ុបបានសន្យាថានឹងពង្រឹងការគ្រប់គ្រងព្រំដែនខាងក្រៅ និងកៀរគរឧបករណ៍ការទូត ច្បាប់ ប្រតិបត្តិការ និងហិរញ្ញវត្ថុ ដើម្បីគ្រប់គ្រងសម្ពាធអន្តោប្រវេសន៍ដែលអាចកើតឡើង៕