យោងតាមសេចក្តីថ្លែងការណ៍មួយពីក្រសួងការបរទេសទីក្រុងប៉េកាំង បានឱ្យដឹងថា រដ្ឋមន្ត្រីការបរទេសចិន លោក Wang Yi កាលពីថ្ងៃអង្គារ បានអំពាវនាវដល់ភាគីនានាឱ្យចាប់យកឱកាសទាំងអស់ដើម្បីចាប់ផ្តើមកិច្ចចរចាសន្តិភាពឱ្យឆាប់បំផុតតាមដែលអាចធ្វើទៅបាន អំឡុងពេលសន្ទនាតាមទូរសព្ទជាមួយសមភាគីអ៊ីរ៉ង់ គឺលោក Abbas Araqchi។

លោក Wang បានប្រាប់លោក Araqchi ថា «ការជជែកគ្នាគឺតែងតែល្អជាងការប្រយុទ្ធគ្នាជានិច្ច» ដោយបន្ថែមថា «បញ្ហាក្តៅគគុកទាំងអស់គួរតែត្រូវបានដោះស្រាយតាមរយៈកិច្ចសន្ទនា និងការចរចា មិនមែនដោយការប្រើប្រាស់កម្លាំងបាយនោះទេ»។

យោងតាមប្រព័ន្ធផ្សព្វផ្សាយរដ្ឋអ៊ីរ៉ង់នៅថ្ងៃពុធ (២៥ មីនា) នេះ បានឱ្យដឹងថា លោក Araqchi បានឆ្លើយតបទៅលោក Wang វិញថា៖ «ការរំពឹងទុកយ៉ាងមុតមាំរបស់អ៊ីរ៉ង់ ពីបណ្ដារដ្ឋជាសមាជិកនៃក្រុមប្រឹក្សាសន្តិសុខ ជាពិសេសចិន និងរុស្ស៊ី គឺជាការទប់ស្កាត់សហរដ្ឋអាមេរិក មិនឱ្យបន្តរំលោភបំពានក្រុមប្រឹក្សានេះ តាមរយៈការប្រកាន់ជំហរយ៉ាងម៉ឺងម៉ាត់ក្នុងការថ្កោលទោសការឈ្លានពានរបស់សហរដ្ឋអាមេរិក និងអ៊ីស្រាអែល»។

ការអំពាវនាវឱ្យមានកិច្ចចរចាសន្តិភាពនេះ កើតឡើងស្របពេលដែលលោកប្រធានាធិបតី Donald Trump បានលើកពីវឌ្ឍនភាពក្នុងការចរចាបញ្ចប់សង្គ្រាម រួមទាំងទទួលបានសម្បទានសំខាន់ៗពីទីក្រុងតេអេរ៉ង់ ខណៈប្រភពមួយបានបញ្ជាក់ថា ទីក្រុងវ៉ាស៊ីនតោនបានផ្ញើសំណើដោះស្រាយ ១៥ចំណុច ទៅកាន់អ៊ីរ៉ង់។ ប្រព័ន្ធផ្សព្វផ្សាយអ៊ីស្រាអែល ក៏បាននិយាយថា អាមេរិកកំពុងស្វះស្វែងរកបទឈប់បាញ់រយៈពេល ១ខែ ដើម្បីពិភាក្សាពីផែនការ ១៥ចំណុចនេះ៕