ដោយយល់ស្របតាមការឯកភាពពីសហរដ្ឋអាមេរិកនិងអ៊ីរ៉ង់ ប្រទេសប៉ាគីស្ថានបានត្រៀមជាស្រេចដើម្បីធ្វើជាម្ចាស់ផ្ទះសម្របសម្រួលកិច្ចចរចាដ៏មានអត្ថន័យ និងច្បាស់លាស់សម្រាប់ការដោះស្រាយដ៏ទូលំទូលាយចំពោះជម្លោះដែលកំពុងបន្តនៅមជ្ឈិមបូព៌ា នេះបើយោងតាមការបង្ហោះនៅលើបណ្តាញផ្សព្វផ្សាយសង្គមកាលពីថ្ងៃអង្គារ។

លោកបាននិយាយថា ប្រទេសប៉ាគីស្ថានស្វាគមន៍និងគាំទ្រយ៉ាងពេញទំហឹង ចំពោះកិច្ចខិតខំប្រឹងប្រែងដើម្បីបន្តការសន្ទនាបញ្ចប់ជម្លោះនៅមជ្ឈិមបូព៌ា ក្នុងផលប្រយោជន៍នៃសន្តិភាព និងស្ថិរភាពនៅក្នុងតំបន់ និងហួសពីនេះ។

ក្រោយមក ប្រធានាធិបតីសហរដ្ឋអាមេរិក លោក ដូណាល់ ត្រាំ បានចែករំលែករូបថតលើអេក្រង់នៃសេចក្តីថ្លែងការណ៍របស់លោក Shehbaz Sharif នៅលើវេទិកា Truth Social របស់លោក។

កាលពីថ្ងៃចន្ទ ប្រធានាធិបតីអ៊ីរ៉ង់ លោក Masoud Pezeshkian បានសន្ទនាតាមទូរស័ព្ទជាមួយលោក Shehbaz Sharif និងបានបញ្ជាក់ជាថ្មីនូវការប្តេជ្ញាចិត្តរបស់ទីក្រុងតេអេរ៉ង់ចំពោះកិច្ចសហប្រតិបត្តិការក្នុងតំបន់ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន Tasnim របស់អ៊ីរ៉ង់។

រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានសន្ទនាតាមទូរស័ព្ទជាមួយឧបនាយករដ្ឋមន្ត្រី និងរដ្ឋមន្ត្រីការបរទេសប៉ាគីស្ថាន លោក Mohammad Ishaq Dar កាលពីថ្ងៃចន្ទ។ ភាគីទាំងពីរ បានផ្លាស់ប្តូរទស្សនៈលើការវិវត្តន៍ចុងក្រោយបំផុតក្នុងតំបន់ ហើយបានឯកភាពគ្នារក្សាទំនាក់ទំនងជិតស្និទ្ធលើស្ថានភាពក្នុងតំបន់។