ប្រភព ២រូបដែលដឹងអំពីការពិភាក្សានេះ បានប្រាប់សារព័ត៌មាន Axios ថា សហរដ្ឋអាមេរិក និងក្រុមអ្នកសម្របសម្រួលក្នុងតំបន់ កំពុងពិភាក្សាអំពីលទ្ធភាពនៃការរៀបចំកិច្ចចរចាសន្តិភាពកម្រិតខ្ពស់ជាមួយអ៊ីរ៉ង់ឲ្យបានឆាប់ នៅថ្ងៃព្រហស្បតិ៍ (ទី២៦ ខែមីនា ឆ្នាំ២០២៦) ប៉ុន្តែពួកគេនៅតែរង់ចាំការឆ្លើយតបពីទីក្រុងតេអេរ៉ង់។

លោកប្រធានាធិបតីអាមេរិក Donald Trump បង្ហាញការចាប់អារម្មណ៍ ក្នុងការបន្ថយភ្លើងសង្គ្រាមនេះ រហូតដល់រលត់ទាំងស្រុង ប៉ុន្តែការរារាំងរបស់អ៊ីរ៉ង់ នៅឈូងសមុទ្រ Hormuz បង្កភាពស្មុគស្មាញដល់ឱកាសនៃយុទ្ធសាស្ត្រចាកចេញណាមួយ។ សហរដ្ឋអាមេរិកបានចែករំលែកជាមួយអ៊ីស្រាអែលអំពីផែនការ ១៥ចំណុចរបស់ខ្លួន ដើម្បីបញ្ចប់សង្គ្រាម ហើយបានអះអាងថា អ៊ីរ៉ង់បានយល់ព្រមលើចំណុចសំខាន់ៗជាច្រើន។ តែមិនទាន់មានភស្តុតាងជាក់ស្តែងណាមួយនៃកិច្ចព្រមព្រៀងបែបនេះនៅឡើយទេ។

ប្រភពពីអ៊ីស្រាអែលចំនួន ២ ឲ្យដឹងថា នាយករដ្ឋមន្ត្រីអ៊ីស្រាអែល លោក Benjamin Netanyahu បារម្ភថា លោក Trump អាចនឹងឈានដល់កិច្ចព្រមព្រៀងមួយ ដែលមិនស្របតាមគោលបំណងរបស់អ៊ីស្រាអែល រួមបញ្ចូលការធ្វើសម្បទានសំខាន់ៗ និងកំណត់សមត្ថភាពរបស់អ៊ីស្រាអែល ក្នុងការវាយប្រហារ លើអ៊ីរ៉ង់។ ចំណែកប្រភពទី៣ បាននិយាយថា ថ្នាក់ដឹកនាំអ៊ីស្រាអែល បានបង្ហាញមន្ទិលសង្ស័យថា តើអ៊ីរ៉ង់ពិតជាបានផ្តល់សម្បទានដូចអ្វីដែលសហរដ្ឋអាមេរិកបានអះអាងមែន ឬយ៉ាងណា។

កាលពីថ្ងៃអង្គារ (ទី២៤ ខែមីនា ឆ្នាំ២០២៦) លោក Trump បានប្រាប់អ្នកសារព័ត៌មាន នៅការិយាល័យប្រធានាធិបតី Oval Office ថា ទោះបីជាមានការបាត់បង់មេដឹកនាំអ៊ីរ៉ង់ជាច្រើនក្ដី ក៏សហរដ្ឋអាមេរិក «កំពុងជជែកត្រូវបុគ្គល ហើយពួកគេចង់ធ្វើកិច្ចព្រមព្រៀងខ្លាំងណាស់»។ យ៉ាងណាក្ដី នាពេលនេះ មន្ត្រីអ៊ីរ៉ង់កំពុងបដិសេធការអះអាងរបស់លោក Trump អំពីការចរចានៅពីក្រោយឆាក តែពួកគេបានបញ្ជាក់ថា សហរដ្ឋអាមេរិកបានផ្ញើសារ និងសំណើនានា។

ប្រទេសប៉ាគីស្ថាន ដែលបានបញ្ជូនសារទៅមក រវាងទីក្រុងតេអេរ៉ង់ និងវ៉ាស៊ីនតោន រួមជាមួយប្រទេសអេហ្ស៊ីប និងទួរគី បានប្រាប់ថា ខ្លួន «ត្រៀមខ្លួនជាស្រេច និងមានកិត្តិយស» ក្នុងការធ្វើម្ចាស់ផ្ទះ សម្រាប់កិច្ចចរចាសន្តិភាពនេះ ប្រសិនបើប្រទេសទាំង២ ព្រមព្រៀងគ្នា។ លោក Trump បានចែករំលែកសាររបស់ប៉ាគីស្ថាននៅលើបណ្ដាញសង្គម Truth Social ដែលជាសញ្ញានៃការចាប់អារម្មណ៍របស់លោក ក្នុងការធ្វើឲ្យកិច្ចប្រជុំកំពូលបែបនេះកើតឡើង៕