គណបក្សរបស់នាយករដ្ឋមន្ត្រីដាណឺម៉ាក លោកស្រី Mette Frederiksen បានឈ្នះការបោះឆ្នោតដែលមានការប្រកួតប្រជែងយ៉ាងប្រកៀកប្រកិត ដោយមានការសន្យាថា នឹងរក្សាស្ថិរភាព អំឡុងភាពចលាចលទូទាំងពិភពលោក ដោយលទ្ធផលនេះបង្កើតបានដំណាក់កាលចរចាបង្កើតរដ្ឋាភិបាលចម្រុះដ៏លំបាកមួយ ជាអ្វីដែលធានាដល់ការកាន់អំណាចអាណត្តិទី៣។

គណបក្សសង្គមប្រជាធិបតេយ្យ (Social Democrats) របស់លោកស្រីនាយករដ្ឋមន្ត្រី បានលេចឡើងក្នុងនាមជាគណបក្សទទួលបានសំឡេងឆ្នោតច្រើនជាងគេបំផុត ជាមួយនឹងសំឡេងគាំទ្រ ២១,៩ភាគរយនៃការបោះឆ្នោតសភា កាលពីថ្ងៃទី២៤ ខែមីនា ឆ្នាំ២០២៦ ជាដំណើរការដែលត្រូវបានគ្របដណ្ដប់ដោយការគំរាមកំហែងរបស់ប្រធានាធិបតីអាមេរិក លោក Donald Trump លើដែនដី Greenland បន្ទាប់ពីសន្លឹកឆ្នោតទាំងអស់ត្រូវបានរាប់ជាបឋម។ យ៉ាងណាក្ដី នេះគឺជាលទ្ធផលអាក្រក់បំផុតលើកដំបូងរបស់គណបក្សនេះ ក្នុងរយៈពេលជាង ១សតវត្សរ៍។

ដោយសារគណបក្សទាំង២ ខ្វះសំឡេងភាគច្រើនដាច់ខាត រដ្ឋមន្ត្រីការបរទេស លោក Lars Lokke Rasmussen មកពីគណបក្សកណ្តាលនិយម បានកាន់តំណែងជាអ្នកសម្រេចធំជាងគេ។ ការស្នើរបស់លោក នៅយប់ថ្ងៃបោះឆ្នោត ដើម្បីឲ្យបន្តរដ្ឋាភិបាលចម្រុះឆ្លងប្លុក ត្រូវបានបដិសេធដោយមេដឹកនាំគណបក្សសេរីនិយម (Liberal) លោក Troels Lund Poulsen ដែលបានច្រានចោលការសហការជាមួយលោកស្រី Frederiksen ដោយធ្វើឲ្យជម្រើសកាន់តែរួមតូច សម្រាប់ការចរចាដែលគ្រោងនឹងចាប់ផ្តើមនៅថ្ងៃទី២៥ ខែមីនានេះ។

គួរបញ្ជាក់ថា ដំណើរការនេះ គឺជាមួយ ក្នុងចំណោមការបោះឆ្នោតអឺរ៉ុបជាបន្តបន្ទាប់ ដែលត្រូវបានរងឥទ្ធិពលដោយការវិលត្រឡប់របស់លោក Trump ទៅកាន់សេតវិមាន។ ចំនួនអ្នកចេញទៅបោះឆ្នោត មាន ៨៤ភាគរយ។ ជារួម ប្លុកដែលមានទំនោរឆ្វេងនិយម ទទួលបាន ៨៤អាសនៈ គូប្រជែងរបស់ខ្លួន មាន ៧៧អាសនៈ ខណៈគណបក្ស Moderates ដណ្ដើមបាន ១៤អាសនៈ៕