ប្រធានាធិបតីបារាំង Emmanuel Macron បានអំពាវនាវឲ្យអ៊ីរ៉ង់ចាប់ផ្ដើមចូលរួម «ការចរចាដោយស្មោះត្រង់» ដើម្បីបើកផ្លូវឆ្ពោះទៅរកការបន្ថយភាពតានតឹង ក្នុងអំឡុងពេលជជែកតាមទូរស័ព្ទជាមួយសមភាគីអ៊ីរ៉ង់របស់លោក គឺលោក Massoud Pezeshkian។ កិច្ចប្រឹងប្រែងទំនាក់ទំនងការទូតនេះ កើតឡើងក្នុងអំឡុងសប្តាហ៍ទី៥ នៃអរិភាព រវាងអ៊ីរ៉ង់ និងកងកម្លាំងអាមេរិក-អ៊ីស្រាអែល។

តាមរយៈសេចក្តីថ្លែងការណ៍មួយ នៅលើបណ្ដាញសង្គម X បន្ទាប់ពីមានការជួបតាមទូរស័ព្ទនោះ លោក Macron បានសង្កត់ធ្ងន់ថា ការទូតត្រូវតែជាមធ្យោបាយដ៏សំខាន់ ដើម្បីបន្ធូរបន្ថយភាពតានតឹងក្នុងតំបន់។ លោកបានលើកឡើងថា កិច្ចប្រឹងប្រែងបែបនេះ គួរតែ «ផ្តល់នូវក្របខ័ណ្ឌមួយ ដើម្បីដោះស្រាយការរំពឹងទុករបស់សហគមន៍អន្តរជាតិ ទាក់ទងនឹងកម្មវិធីនុយក្លេអ៊ែរ និងមីស៊ីលបាលីស្ទិករបស់អ៊ីរ៉ង់ ក៏ដូចជាសកម្មភាពបង្កអស្ថិរភាពក្នុងតំបន់របស់ប្រទេសនេះផងដែរ»។

ជាមួយគ្នានេះ មេដឹកនាំបារាំងរូបនេះបានបញ្ជាក់ជាថ្មីអំពី «ភាពចាំបាច់ដាច់ខាតនៃការបញ្ចប់ការវាយប្រហារដែលមិនអាចទទួលយកបាន លើប្រទេសនានាក្នុងតំបន់» ដោយអំពាវនាវឲ្យមានការការពារហេដ្ឋារចនាសម្ព័ន្ធស៊ីវិល និងថាមពល។

លើសពីនោះទៀត លោក Macron ក៏បានជំរុញឲ្យទីក្រុងតេអេរ៉ង់ស្តារសេរីភាពនៃការធ្វើនាវាចរណ៍ឡើងវិញ នៅក្នុងច្រកសមុទ្រ Hormuz ដែលជាសរសៃឈាមដ៏សំខាន់ សម្រាប់ការផ្គត់ផ្គង់ថាមពលសកល និងដែលត្រូវបានរាំងខ្ទប់ចាប់តាំងពីដើមខែមីនា។ ការរំខាននេះបានធ្វើឲ្យថ្លៃដឹកជញ្ជូនត្រូវចំណាយខ្ពស់ និងរុញឲ្យតម្លៃប្រេងសកលហក់ឡើងខ្ពស់ ដែលបង្កើនសម្ពាធលើសេដ្ឋកិច្ច ដោយសារតែជម្លោះនេះ៕