បេសកជនប្រចាំតំបន់ហ្កាហ្សា នៅក្នុងក្រុមប្រឹក្សាសន្តិភាព (Board of Peace) របស់ប្រធានាធិបតីអាមេរិក លោក Donald Trump បានជំរុញឲ្យសមាជិកក្រុមប្រឹក្សាសន្តិសុខអង្គការសហប្រជាជាតិ ដាក់សម្ពាធលើក្រុមសកម្មប្រយុទ្ធហាម៉ាសឲ្យរំសាយអាវុធ ដែលជាផ្នែកមួយនៃបទឈប់បាញ់ ដើម្បីបញ្ចប់សង្គ្រាមជាង ២ឆ្នាំ។

អ្នកការទូតប៊ុលហ្គារីចាស់វស្សា លោក Nickolay Mladenov ដែលត្រូវបានតែងតាំងជាតំណាងជាន់ខ្ពស់របស់ក្រុមប្រឹក្សាសន្តិភាពនេះ សម្រាប់តំបន់ហ្កាហ្សា បាននិយាយថា៖ «ខ្ញុំសូមស្នើឲ្យសមាជិកក្រុមប្រឹក្សាប្រើប្រាស់មធ្យោបាយទាំងអស់ដែលខ្លួនមាន ដើម្បីជំរុញឲ្យក្រុមហាម៉ាស និងក្រុមសកម្មប្រយុទ្ធប៉ាឡេស្ទីនទាំងអស់ ទទួលយកក្របខ័ណ្ឌនេះ ដោយមិនពន្យារពេលយូរតទៅទៀត»។

លោកបានប្រាប់កិច្ចប្រជុំក្រុមប្រឹក្សាសន្តិសុខ ស្តីពីជម្លោះប៉ាឡេស្ទីនថា៖ «រៀងរាល់ម៉ោង រៀងរាល់ថ្ងៃ ត្រូវបានកន្លងទៅដោយឥតប្រយោជន៍ នាំឲ្យមានការបាត់បង់អាយុជីវិតមនុស្ស និងធ្វើឲ្យប៉ះពាល់បន្ថែមទៀតដល់ដំណើរការសន្តិភាពដែលអាចទុកចិត្តបាន និងយូរអង្វែង»។

គួរបញ្ជាក់ថា រដ្ឋបាលរបស់លោក Trump រួមជាមួយប្រទេសកាតា និងអេហ្ស៊ីប បានចរចាឲ្យមានបទឈប់បាញ់មួយ កាលពីខែតុលាឆ្នាំមុន ដើម្បីបញ្ឈប់សង្គ្រាមដ៏បំផ្លិចបំផ្លាញរយៈពេល ២ឆ្នាំ នៅតំបន់ហ្កាហ្សា។ 

កាលពីខែមករាឆ្នាំនេះ ទីក្រុងវ៉ាស៊ីនតោនបានឲ្យដឹងថា ខ្លួនកំពុងឈានចូលដំណាក់កាលទី២ នៃផែនការសន្តិភាព ដែលអំពាវនាវឲ្យមានការរំសាយអាវុធរបស់ក្រុមហាម៉ាស ដែលការវាយប្រហារមិនធ្លាប់មានពីមុនរបស់ខ្លួន កាលពីថ្ងៃទី៧ ខែតុលា ឆ្នាំ២០២៣ លើអ៊ីស្រាអែល បានបង្កឲ្យមានការវាយលុកយ៉ាងខ្លាំងសងសឹកវិញ។ ផែនការនេះក៏អំពាវនាវឲ្យមានការដកបន្តិចម្តងៗនៃកងកម្លាំងអ៊ីស្រាអែល និងការដាក់ពង្រាយកងកម្លាំងរក្សាស្ថិរភាពអន្តរជាតិ៕