បុគ្គលិករាប់រយនាក់ ពីសាជីវកម្មប្រព័ន្ធផ្សព្វផ្សាយសាធារណៈអូស្ត្រាលី បានចាប់ផ្តើមធ្វើកូដកម្មរយៈពេល ១ថ្ងៃ នៅថ្ងៃពុធ (ទី២៥ ខែមីនា ឆ្នាំ២០២៦) នេះ ដែលជាការបង្ហាញការតវ៉ាលើកដំបូង ក្នុងរយៈពេល ២០ឆ្នាំ ជុំវិញបញ្ហាប្រាក់ឈ្នួល និងលក្ខខណ្ឌការងារ ដោយនេះបានរំខានដល់ការផ្សាយផ្ទាល់កម្មវិធីព័ត៌មាន នៅស្ថានីយប្រព័ន្ធផ្សព្វផ្សាយសាធារណៈ។

កម្មវិធីផ្សាយផ្ទាល់ ត្រូវបានបង្វែរទៅចាក់ផ្សាយមាតិកាពីស្ថានីយប្រព័ន្ធផ្សព្វផ្សាយសាធារណៈ BBC របស់ចក្រភពអង់គ្លេស នៅពេលដែលកូដកម្មនេះ បានចាប់ផ្តើមនៅម៉ោង ១១:០០ព្រឹក ម៉ោងក្នុងស្រុក (ត្រូវនឹងម៉ោង ០០:០០ ម៉ោងសកល)។ កម្មវិធីល្បីៗ នៅលើទូរទស្សន៍ និងវិទ្យុ ក៏ត្រូវបានគេរំពឹងថា នឹងត្រូវជំនួសដោយការចាក់ផ្សាយឡើងវិញ ក្នុងអំឡុងពេលមានកូដកម្ម ២៤ម៉ោងនេះ។

កូដកម្មនេះកើតឡើងបន្ទាប់ពីមានការចរចា អំពីប្រាក់ខែជាច្រើនខែ រវាងបុគ្គលិក និងថ្នាក់គ្រប់គ្រង។ បុគ្គលិករបស់ប្រព័ន្ធផ្សព្វផ្សាយ ABC ភាគច្រើន ក្នុងសប្តាហ៍នេះ បានបដិសេធការផ្តល់ជូនចុងក្រោយនៃការដំឡើងប្រាក់ខែ ១០ភាគតយ ក្នុងរយៈពេល ៣ឆ្នាំ និងប្រាក់លើកទឹកចិត្ត ១.០០០ដុល្លារអូស្ត្រាលី (៧០០ដុល្លារ) សម្រាប់បុគ្គលិកដែលកំពុងបន្តការងារ និងបុគ្គលិកជាប់កិច្ចសន្យា។

១ភាគ៣ នៃបុគ្គលិក ៤.៥០០នាក់របស់ប្រព័ន្ធផ្សព្វផ្សាយ ABC គឺជាសមាជិកសហជីព។ បុគ្គលិកប្រហែល ១.០០០នាក់ បានបោះឆ្នោតគាំទ្រឲ្យចាត់វិធានការឧស្សាហកម្ម បន្ទាប់ពីការចរចាបរាជ័យ។ សហជីព Media, Entertainment និង Arts Alliance បានឲ្យដឹងថា ការផ្តល់ជូននេះ គឺទាបជាងអតិផរណា ហើយមិនបានធានាដល់លក្ខខណ្ឌការងារដែលមានសុវត្ថិភាពឡើយ។ សហជីពបានបន្ថែមថា ប្រាក់រង្វាន់លើកទឹកចិត្តចំនួន ១.០០០ដុល្លារអូស្ត្រាលីនោះ ក៏មិនរួមបញ្ចូលសមាជិកបុគ្គលិកក្រៅម៉ោង ឬធ្វើការបណ្ដោះអាសន្ននោះដែរ៕