កំហឹងរបស់សាធារណជនកើនឡើងនៅថ្ងៃពុធនេះ ចំពោះក្តីបារម្ភពីកង្វះខាតប្រេង ស្របពេលការអះអាងរបស់រដ្ឋាភិបាលកុំឲ្យសម្រុកទិញស្តុក ។

ឥណ្ឌា រងផលប៉ះពាល់ខ្លាំងដោយសារការអាក់ខានការដឹកជញ្ជូនថាមពលឆ្លងកាត់តាមច្រកសមុទ្រ Hormuz បណ្តាលមកពីសង្រ្គាមសហរដ្ឋអាមេរិក-អ៊ីស្រាអែលលើអ៊ីរ៉ង់ ដែលបច្ចុប្បន្នបានឈានចូលដល់សប្តាហ៍ទី ៤ទៅហើយ ។

នៅតាមរដ្ឋខ្លះរបស់ឥណ្ឌា រួមទាំងរដ្ឋ Maharashtra, Madhya Pradesh និងរដ្ឋ Telangana ការតម្រង់ជួរបន្តកន្ទុយគ្នាផុតស្ថានីយប្រេង ក្នុងនោះមនុស្សជាច្រើន បានរង់ចាំអស់រយៈពេលជាច្រើនម៉ោង ទម្រាំអាចចាក់ប្រេងបាន ។

ប្រទេសមួយនេះ នាំចូលប្រេងឆៅប្រហែល ៩០ភាគរយ និងជិតពាក់កណ្តាលឧស្ម័នធម្មជាតិរាវ ដោយឆ្លងកាត់តាមច្រកសមុទ្រ Hormuz ។

ឥណ្ឌា ដែលមានស្តុកប្រេងឆៅតិចជាងប្រទេសនាំចូលប្រេងអាស៊ីធំៗផ្សេងទៀតនោះ ប្រញាប់ប្រញាល់កក់ប្រេងរុស្ស៊ីផងដែរ ក្រោយសហរដ្ឋអាមេរិកដកចេញទណ្ឌកម្មបណ្តោះអាសន្នកាលពីពេលថ្មីៗនេះ ៕