ព្រះបរមរាជវាំង បាននិយាយនៅក្នុងសេចក្តីថ្លែងការណ៍ថា នាយករដ្ឋមន្រ្តីដាណឺម៉ាកលោកស្រី Mette Frederiksen បានដាក់ពាក្យលាលែងពីរដ្ឋាភិបាលរបស់លោកស្រីទៅកាន់ព្រះមហាក្សត្រ ក្រោយក្រុមចម្រុះមាន ៣គណបក្សរបស់លោកស្រី ទទួលបរាជ័យនៅការបោះឆ្នោតសកល ។ 

គណបក្សជាច្រើន កំពុងចរចាគ្នានៅថ្ងៃពុធនេះ ដើម្បីកំណត់ថាតើរដ្ឋាភិបាលបន្ទាប់នឹងត្រូវបង្កើតឡើងដោយលោកស្រី Frederiksen ឬមេដឹកនាំគណបក្សផ្សេង ។

កាលពីថ្ងៃអង្គារ គណបក្សសង្គមប្រជាធិបតេយ្យរបស់លោកស្រី Frederiksen មាននូវការបោះឆ្នោតដ៏អាក្រក់បំផុតចាប់តាំងពីឆ្នាំ ១៩០៣ ពេលដែលពួកគេឈ្នះត្រឹមតែ ៣៨អាសនៈប៉ុណ្ណោះ នៅក្នុងសភាមាន ១៧៩អាសនៈ ពោលគឺធ្លាក់ចុះពី ៥០អាសនៈកាលពីរយៈពេល ៤ឆ្នាំមុន ស្របពេលអ្នកបោះឆ្នោតព្រួយបារម្ភពីបញ្ហាអន្តោប្រវេសន៍ វិបត្តិថ្លៃរស់នៅ និងសុខុមាភាព ។

ប្លុកនិយមឆ្វេងរបស់លោកស្រី បានឈ្នះ ៨៤អាសនៈនៅក្នុងសភា ទល់នឹង ៧៧អាសនៈសម្រាប់គណបក្សនិយមស្តាំ ក្នុងនោះភាគីទាំង ២ មិនអាចសម្រេចបាន ៩០អាសនៈដែលត្រូវការសម្រាប់សំឡេងភាគច្រើននោះឡើយ ។

លទ្ធផលនេះដែរ នឹងទុកឲ្យភាគីទាំង ២ពឹងផ្អែកលើ ១៤អាសនៈដែលឈ្នះដោយគណបក្សមិនចំណុះរបស់លោករដ្ឋមន្រ្តីការបរទេស Lars Lokke Rasmussen ដែលជាក្រុមនិយមកណ្តាល ដែលអាចជាស្តេចនៅក្នុងកិច្ចប្រជុំបង្កើតរដ្ឋាភិបាលចម្រុះ ៕