អង្គការណាសា នឹងលុបចោលផែនការបញ្ជូនស្ថានីយអវកាសសាងសង់រួចភាគច្រើន ទៅកាន់គន្លងឋានព្រះចន្ទ ហើយនិងជំនួសមកវិញដោយសមាសធាតុរបស់ខ្លួន ក្នុងការសាងសង់មូលដ្ឋានតម្លៃ ២០លានដុល្លារនៅលើផ្ទៃព្រះចន្ទ ក្នុងរយៈពេលជាង ៧ឆ្នាំទៀត ។

ប្រធានថ្មីរបស់អង្គការណាសាលោក Jared Isaacman បានប្រកាសការផ្លាស់ប្តូកម្មវិធីឋានព្រះចន្ទរបស់អង្គការណាសា ដែលជាគម្រោង Artemis អំឡុងព្រឹត្តការណ៍រយៈពេល ១ថ្ងៃកាលពីថ្ងៃអង្គារ នៅទីស្នាក់ការកណ្តាលអង្គការណាសា ស្ថិតក្នុងទីក្រុងវ៉ាស៊ីនតោន ។

លោក Isaacman និយាយថា បើទោះបីជាមានការលំបាកលើកាលបរិច្ឆេត និងកម្មវិធី Hardware យ៉ាងណាក្តី ពួកយើងអាចប្រើប្រាស់ឧបករណ៍ឡើងវិញ និងការប្តេជ្ញាចិត្តរបស់ដៃគូអន្តរជាតិ ដើម្បីគាំទ្រគម្រោង SURFACE ហើយគោលបំណងកម្មវិធីដទៃទៀត ។

គួរឲ្យដឹងថា គម្រោង Lunar Gateway ត្រូវបានបម្រុងទុកធ្វើជាស្ថានីយអវកាសស្ថិតនៅលើគន្លងព្រះចន្ទ ។ វាត្រូវបានរចនាឡើង ដើម្បីបម្រើទាំងស្ថានីយស្រាវជ្រាវ និងស្ថានីយផ្ទេរ ជាទីដែលអវកាសយានិកនឹងឡើងជិះយានអវកាសចុះចតឋានព្រះចន្ទ មុនពេលចុះលើផ្ទៃព្រះចន្ទ ។

ការផ្លាស់ប្តូរធ្វើឡើងដោយលោក Isaacman ក្នុងរយៈពេលប៉ុន្មានសប្តាហ៍កន្លងមកនេះ នឹងរៀបចំឡើងវិញកិច្ចសន្យាតម្លៃរាប់ពាន់លានដុលលារ ក្រោមកិច្ចខិតខំរបស់សហរដ្ឋអាមេរិក ។

លោក Isaacman និយាយថា អង្គការណាសា បានចាប់ផ្តើម ពួកយើងនឹងនាំអាមេរិកត្រឡប់ទៅឋានព្រះចន្ទវិញ មុនពេលបញ្ចប់អាណត្តិរបស់លោកប្រធានាធិបតី Trump ។ អ្នកប្រកួតប្រជែងដ៏អស្ចារ្យរបស់ពួកយើងនិយាយថា នៅមុនឆ្នាំ ២០៣០ ។ ភាពខុសគ្នារវាងជោគជ័យ និងបរាជ័យ នឹងត្រូវគណនាក្នុងរយៈពេលប៉ុន្មានខែខាងមុខនេះ មិនមែនប៉ុន្មានឆ្នាំនោះទេ ។ 

ស្របពេលចិនប្រជែងចុះចតលើឋានព្រះចន្ទខ្លួនឯងដែរនោះ បច្ចុប្បន្នក្រុមហ៊ុនជាច្រើនក្រោមចំណុះអង្គការណាសា កំពុងប្រឹងប្រែង ដើម្បីអាចទៅឋានព្រះចន្ទ ៕