សេចក្ដីរាយការណ៍របស់សារព័ត៌មានរ៉យទ័រ ដោយយោងតាមប្រភពក្នុងតំបន់ចំនួន៦ ដែលដឹងពីជំហររបស់អ៊ីរ៉ង់បានឱ្យដឹងថា ទីក្រុងតេអេរ៉ង់ បានប្រាប់ក្រុមអន្តរការីថា លីបង់ត្រូវតែរួមបញ្ចូលក្នុងកិច្ចព្រមព្រៀងឈប់បាញ់ណាមួយជាមួយសហរដ្ឋអាមេរិក និងអ៊ីស្រាអែល ដោយផ្សារភ្ជាប់ការបញ្ចប់សង្គ្រាមអ៊ីរ៉ង់ ទៅនឹងការបញ្ឈប់ប្រតិបត្តិការយោធារបស់អ៊ីស្រាអែល ប្រឆាំងនឹងក្រុមសកម្មប្រយុទ្ធហេសបូឡា។

កាលពីថ្ងៃពុធ (២៥ មីនា) ប៉ុស្តិ៍ទូរទស្សន៍ Press TV របស់អ៊ីរ៉ង់ បានដកស្រង់សម្តីមន្ត្រីអ៊ីរ៉ង់មួយរូបដែលនិយាយថា ទីក្រុងតេអេរ៉ង់ចង់ឱ្យកិច្ចព្រមព្រៀងណាមួយជាមួយអាមេរិក ធានាបាននូវការបញ្ចប់សង្គ្រាមទាំងលើអ៊ីរ៉ង់ និង «ក្រុមតស៊ូ» ដទៃទៀតក្នុងតំបន់។ មន្ត្រីជាន់ខ្ពស់អ៊ីរ៉ង់មួយរូបបានប្រាប់សារព័ត៌មានរ៉យទ័រកាលពីថ្ងៃពុធថា ទីក្រុងតេអេរ៉ង់កំពុងពិនិត្យមើលសំណើរបស់អាមេរិក ដើម្បីបញ្ចប់សង្គ្រាមក្នុងតំបន់ដែលបានអូសបន្លាយជិតមួយខែមកហើយ ដែលនេះបង្ហាញថា រហូតមកដល់ពេលនេះ ទីក្រុងតេអេរ៉ង់មិនទាន់បានបដិសេធសំណើនោះភ្លាមៗនៅឡើយទេ។

ប្រភពក្នុងតំបន់ទាំង៦ ដែលសុំមិនបញ្ចេញឈ្មោះបាននិយាយថា ទីក្រុងតេអេរ៉ង់បានជូនដំណឹងដល់ក្រុមអន្តរការីតាំងពីពាក់កណ្តាលខែមីនាមកម្ល៉េះថា ខ្លួនចង់បានកិច្ចព្រមព្រៀងមួយ ដែលនឹងបញ្ឈប់ការវាយប្រហាររបស់អ៊ីស្រាអែល លើក្រុមប្រដាប់អាវុធលីបង់ ហេសបូឡា ផងដែរ។

គួរឱ្យដឹងថា ក្រុមហេសបូឡា ត្រូវបានបង្កើតឡើងដោយកងឆ្មាំបដិវត្តន៍អ៊ីរ៉ង់ ក្នុងឆ្នាំ១៩៨២ ហើយត្រូវបានគេមើលឃើញយ៉ាងទូលំទូលាយថា ជាកម្លាំងឈានមុខគេនៃសម្ព័ន្ធភាពក្រុមប្រដាប់អាវុធក្នុងតំបន់របស់អ៊ីរ៉ង់។ ក្រុមនេះបានបើកការបាញ់ប្រហារលើអ៊ីស្រាអែល កាលពីថ្ងៃទី២ ខែមីនា ដើម្បីបង្ហាញសាមគ្គីភាពជាមួយទីក្រុងតេអេរ៉ង់ ដែលជាហេតុបង្កឱ្យមានយុទ្ធនាការវាយប្រហារតាមអាកាស និងតាមជើងគោកជាថ្មីម្ដងទៀតរបស់អ៊ីស្រាអែល នៅលីបង់៕