លោក Volodymyr Zelenskyy បាននិយាយកាលពីថ្ងៃពុធ២៥មីនាសប្ដាហ៍នេះថា ការធានាសន្តិសុខរបស់សហរដ្ឋអាមេរិកនឹងមិនត្រូវបានផ្តល់ជូនអ៊ុយក្រែនទេ លុះត្រាតែអ៊ុយក្រែនប្រគល់តំបន់ Donbas ភាគខាងកើតទាំងមូលទៅឱ្យប្រទេសរុស្ស៊ី។ 

ថ្លែងទៅកាន់សារព័ត៌មាន Reuters ប្រធានាធិបតីអ៊ុយក្រែនរូបនេះ បាននិយាយថាអាមេរិកត្រៀមខ្លួនរួចរាល់ដើម្បីសម្រេចជាចុងក្រោយសម្រាប់ការធានាទាំងនេះនៅកម្រិតខ្ពស់ នៅពេលអ៊ុយក្រែនត្រៀមខ្លួនដកចេញពីតំបន់ Donbas។

ទីក្រុងគីវអះអាងថា ខ្លួននឹងមិនបោះបង់ចោលទឹកដីណាមួយដែលកាន់កាប់ដោយរុស្ស៊ីទេ ដោយសង្កត់ធ្ងន់ថា នេះជាបន្ទាត់ក្រហមនៅក្នុងការចរចាសន្តិភាពណាមួយ។

លោក Zelenskyy បាននិយាយថា វិធានការនេះនឹងធ្វើឱ្យអ៊ុយក្រែនចុះខ្សោយ និងពង្រឹងទីក្រុងមូស្គូក្នុងរយៈពេលវែង។

លោកបានបន្ថែមថា មជ្ឈិមបូព៌ាពិតជាមានឥទ្ធិពលលើប្រធានាធិបតី Trump ដោយសំដៅទៅលើសកម្មភាពយោធារួមគ្នារវាងសហរដ្ឋអាមេរិក និងអ៊ីស្រាអែលនៅអ៊ីរ៉ង់ ប៉ុន្តែលោកនៅតែជ្រើសរើសយុទ្ធសាស្ត្រដើម្បីដាក់សម្ពាធបន្ថែមទៀតលើភាគីអ៊ុយក្រែន។

ទីក្រុងវ៉ាស៊ីនតោនបានស្នើរួចហើយឱ្យប្រគល់ដែនដីតំបន់ Donbas ដែលជាបេះដូងឧស្សាហកម្មរបស់អ៊ុយក្រែន នៅក្នុងផែនការ២៨ ចំណុចដ៏ចម្រូងចម្រាសរបស់ខ្លួនដែលបានបង្ហាញដល់ទីក្រុងគីវ និងទីក្រុងមូស្គូកាលពីឆ្នាំមុន។

ការចរចាត្រីភាគីបានបរាជ័យក្នុងការឈានដល់ការទម្លាយភាពជាប់គាំងណាមួយលើបញ្ហាសំខាន់ៗនៃទឹកដី និងសន្តិសុខ ខណៈសន្ទុះការទូតត្រូវបានជាប់គាំងដោយសារសង្គ្រាមរបស់លោក Trump នៅក្នុងប្រទេសអ៊ីរ៉ង់៕