អ្នកនាំពាក្យសេតវិមាន លោកស្រី Karoline Leavitt បាននិយាយកាលពីថ្ងៃពុធ (២៥ មីនា) ថា លោកប្រធានាធិបតី Donald Trump នឹងវាយប្រហារអ៊ីរ៉ង់ កាន់តែខ្លាំងជាងមុន ប្រសិនបើទីក្រុងតេអេរ៉ង់ មិនព្រមទទួលស្គាល់ថា អ៊ីរ៉ង់បាន «បរាជ័យផ្នែកយោធា» នោះទេ។ លោកស្រី Leavitt បាននិយាយក្នុងសន្និសីទសារព័ត៌មានថា៖ «ប្រធានាធិបតី Trump មិននិយាយលេងទេ ហើយលោកបានត្រៀមខ្លួនរួចជាស្រេចក្នុងការទម្លាក់មហន្តរាយកាន់តែធ្ងន់ធ្ងរជាងមុន។ អ៊ីរ៉ង់មិនគួរវិនិច្ឆ័យខុសម្តងទៀតឡើយ»។

លោកស្រីបន្តថា៖ «ប្រសិនបើអ៊ីរ៉ង់ មិនបានទទួលស្គាល់ការពិតនៃស្ថានភាពបច្ចុប្បន្ន ប្រសិនបើពួកគេនៅតែមិនយល់ថា ខ្លួនបានចាញ់ផ្នែកយោធាទេនោះ ប្រធានាធិបតី Trump នឹងធានាថា ពួកគេនឹងរងការវាយប្រហារដ៏ខ្លាំងក្លាដែលមិនធ្លាប់ជួបប្រទះពីមុនមក»។ លោកស្រី Leavitt ក៏បានបញ្ជាក់ពីកិច្ចចរចាដែលកំពុងបន្តជាមួយអ៊ីរ៉ង់ផងដែរ។

ខណៈសង្រ្គាមរួមគ្នារវាងអាមេរិក និងអ៊ីស្រាអែល ប្រឆាំងនឹងអ៊ីរ៉ង់ បានឈានចូលដល់សប្តាហ៍ទីបួន កិច្ចខិតខំប្រឹងប្រែងក៏មានកាន់តែច្រើនពីបណ្តាប្រទេសដូចជា ប៉ាគីស្ថាន ទួរគី និងអេហ្ស៊ីប ដើម្បីធ្វើជាអ្នកសម្របសម្រួល។ មន្ត្រីជាន់ខ្ពស់អ៊ីរ៉ង់មួយរូបបានប្រាប់សារព័ត៌មានរ៉យទ័រកាលពីថ្ងៃពុធថា អ៊ីរ៉ង់នៅតែបន្តពិនិត្យមើលសំណើរបស់អាមេរិកដើម្បីបញ្ចប់សង្រ្គាម ទោះបីជាការឆ្លើយតបដំបូងមានលក្ខណៈអវិជ្ជមានក៏ដោយ ដែលនេះបង្ហាញថា ទីក្រុងតេអេរ៉ង់មិនច្រានសំណើនោះចោលទាំងស្រុងឡើយ។

ប្រព័ន្ធផ្សព្វផ្សាយជាច្រើនកាលពីថ្ងៃអង្គារបានរាយការណ៍ថា ទីក្រុងវ៉ាស៊ីនតោន បានផ្ញើផែនការ ១៥ចំណុច ស្តីពីការបញ្ចប់សង្រ្គាមទៅឱ្យទីក្រុងតេអេរ៉ង់។ លោកស្រី Leavitt បញ្ជាក់ថា ធាតុផ្សំមួយចំនួននៃរបាយការណ៍ទាំងនោះមិនត្រឹមត្រូវទាំងស្រុងទេ ប៉ុន្តែលោកស្រីក៏មិនបានលម្អិតជាក់លាក់ដែរ៕