មន្ត្រីជាន់ខ្ពស់ម្នាក់នៅទីក្រុងតេអេរ៉ង់បានព្រមានថា របាយការណ៍ចារកម្មបានបង្ហាញថា «សត្រូវរបស់អ៊ីរ៉ង់» កំពុងមានផែនការកាន់កាប់កោះអ៊ីរ៉ង់មួយ ដោយមានការគាំទ្រពីប្រទេសមួយក្នុងតំបន់ដែលមិនបង្ហាញឈ្មោះ។ ⁠

លោក Mohammad Bagher Ghalibaf ប្រធានសភាអ៊ីរ៉ង់ បាននិយាយកាលពីថ្ងៃពុធថា ការប៉ុនប៉ងណាមួយ នឹងត្រូវបានឆ្លើយតបដោយការវាយប្រហារកំណត់គោលដៅលើ «ហេដ្ឋារចនាសម្ព័ន្ធសំខាន់ៗ» របស់ប្រទេសក្នុងតំបន់ ដែលលោកមិនបានប្រាប់ឈ្មោះប្រទេសជួយក្នុងប្រតិបត្តិការនេះទេ។

លោក Ghalibaf បាននិយាយនៅក្នុងការបង្ហោះសារចំនួនពីរដាច់ដោយឡែកពីគ្នានៅលើបណ្តាញផ្សព្វផ្សាយសង្គមថា «កងកម្លាំងអ៊ីរ៉ង់ កំពុងតាមដានសកម្មភាពរបស់សត្រូវ ហើយប្រសិនបើពួកគេមានចំណាត់ការណាមួយ យើងនឹងវាយប្រហារហេដ្ឋារចនាសម្ព័ន្ធសំខាន់ៗនៅក្នុងប្រទេសក្នុងតំបន់នោះក្នុងការវាយប្រហារជាបន្តបន្ទាប់ និងឥតឈប់ឈរ»។ ការព្រមានរបស់លោក Ghalibaf ធ្វើឡើងនៅពេលដែលប្រធានាធិបតីសហរដ្ឋអាមេរិក លោក Donald Trump បានបន្តអះអាងថា សហរដ្ឋអាមេរិកស្ថិតក្នុងការចរចាជាមួយអ៊ីរ៉ង់ដើម្បីបញ្ចប់សង្គ្រាមដែលទីក្រុងតេអេរ៉ង់បានច្រានចោល ខណៈសេតវិមានក៏បានបង្ហាញពីការគំរាមកំហែងថ្មីលើមេដឹកនាំអ៊ីរ៉ង់។ លោកស្រី Karoline Leavitt អ្នកនាំពាក្យសេតវិមាន បាននិយាយកាលពីថ្ងៃពុធថា អ៊ីរ៉ង់ ត្រូវតែទទួលយកការបរាជ័យ។ «ប្រសិនបើអ៊ីរ៉ង់ មិនទទួលយកការពិតនាពេលបច្ចុប្បន្ន ប្រសិនបើពួកគេមិនយល់ថាពួកគេត្រូវបានធ្វើឲ្យបរាជ័យដោយយោធា ហើយបន្តសកម្មភាព នោះលោកប្រធានាធិបតី Trump នឹងធានាថាពួកគេត្រូវបានវាយប្រហារខ្លាំងជាងអ្វីដែលពួកគេមិនធ្លាប់ត្រូវបានវាយប្រហារកាលពីពេលមុន»។ ការអះអាងរបស់ទីក្រុងវ៉ាស៊ីនតោន អំពីកិច្ចចរចាសន្តិភាព ខណៈគំរាមកំហែងធ្វើសង្គ្រាមដាក់ទណ្ឌកម្មកាន់តែខ្លាំងលើប្រទេសអ៊ីរ៉ង់ បានកើតឡើងនៅពេលដែលមន្ទីរបញ្ចកោណបញ្ជូនកងទ័ពអាកាសរាប់ពាន់នាក់ទៅកាន់តំបន់ឈូងសមុទ្រ ដោយបន្ថែមទៅលើកងម៉ារីនអាមេរិកពីរក្រុមដែលកំពុងធ្វើដំណើររួចហើយ។