ប្រភពព័ត៌មាននានានៅក្នុងក្រសួងការបរទេសប៉ាគីស្ថាន បានប្រាប់សារព័ត៌មាន Anadolu កាលពីថ្ងៃពុធ ២៥មីនាសប្ដាហ៍នេះថា ការទម្លាយភាពជាប់គាំង ត្រូវបានរំពឹងទុកក្នុងរយៈពេល ៤៨ ម៉ោង លើកិច្ចចរចាដែលអាចកើតមានរវាងអាមេរិក និងអ៊ីរ៉ង់ ដើម្បីបញ្ចប់សង្គ្រាមបច្ចុប្បន្ន ប៉ុន្តែទីក្រុងតេអេរ៉ង់ នៅតែស្ទាក់ស្ទើរ ក្នុងការចូលរួមចរចាដែលបានស្នើឡើងដោយគ្មានការធានាជាក់លាក់។

មន្ត្រីមួយរូបមកពីក្រសួងខាងលើ បាននិយាយថា កិច្ចខិតខំប្រឹងប្រែងកំពុងដំណើរការលើផ្នែករបស់ប៉ាគីស្ថាន ទួរគី និងអេហ្ស៊ីប ដើម្បីទាក់ទាញអ្នកពាក់ព័ន្ធទាំងអស់ ជាពិសេសអ៊ីរ៉ង់ ដែលនៅតែស្ទាក់ស្ទើរក្នុងការធ្វើកិច្ចចរចាដោយគ្មានការធានាជាក់លាក់។

យោងតាមមន្ត្រី ដែលបាននិយាយសុំមិនបញ្ចេញឈ្មោះបានឲ្យដឹងថា ថ្នាក់ដឹកនាំជាន់ខ្ពស់របស់ប៉ាគីស្ថាន រួមទាំងលោកនាយករដ្ឋមន្ត្រី Shehbaz Sharif និងរដ្ឋមន្ត្រីការបរទេសលោក Ishaq Dar កំពុងទាក់ទងជាប្រចាំ ជាមួយថ្នាក់ដឹកនាំអ៊ីរ៉ង់ ដើម្បីបញ្ចុះបញ្ចូលពួកគេឱ្យចូលរួមក្នុងកិច្ចចរចា។

មន្ត្រីរូបនោះបាននិយាយថា ទីក្រុងតេអេរ៉ង់ នៅតែប្រកាន់ខ្ជាប់ការទាមទាររបស់ខ្លួន ដោយស្វែងរកការធានាថានឹងមិនមានប្រតិបត្តិការយោធានាពេលអនាគតប្រឆាំងនឹងអ៊ីរ៉ង់ទៀតឡើយ កម្មវិធីមីស៊ីលរបស់ខ្លួននឹងមិនជាផ្នែកមួយនៃការចរចាទេ ហើយទីក្រុងតេអេរ៉ង់នឹងទទួលបានសំណងសម្រាប់ការខាតបង់ដែលបង្កឡើងដោយសហរដ្ឋអាមេរិក និងអ៊ីស្រាអែល។

លោក Sharif កាលពីថ្ងៃអង្គារសប្ដាហ៍នេះដែរ បាននិយាយថា ទីក្រុងអ៊ីស្លាម៉ាបាដ ត្រៀមខ្លួនរួចជាស្រេច ធ្វើជាម្ចាស់ផ្ទះនៃកិច្ចចរចា ប្រកបដោយអត្ថន័យ និងច្បាស់លាស់រវាងអាមេរិក និងអ៊ីរ៉ង់ សម្រាប់ដំណោះស្រាយដ៏ទូលំទូលាយ ដើម្បីបញ្ចប់សង្គ្រាមនៅមជ្ឈិមបូព៌ា។

មេបញ្ជាការកងទ័ពប៉ាគីស្ថាន ឧត្តមសេនីយ៍ Asim Munir ក៏បាននិយាយជាមួយប្រធានាធិបតីអាមេរិក លោក Donald Trump ផងដែរកាលពីថ្ងៃអាទិត្យអំពីសង្គ្រាមដែលកំពុងបន្ត ហើយប្រទេសអាស៊ីខាងត្បូងនេះបានស្នើខ្លួនធ្វើជាម្ចាស់ផ្ទះនៃកិច្ចប្រជុំកំពូលដែលអាចធ្វើទៅបានរវាងរដ្ឋបាលជាន់ខ្ពស់របស់លោក Trump និងមន្ត្រីអ៊ីរ៉ង់ ដែលជាចំណែកមួយនៃកិច្ចខិតខំប្រឹងប្រែងផ្នែកការទូតរបស់ខ្លួន៕