អ្នកបើកបររថយន្តដឹកជញ្ជូនសាធារណៈនៅទីក្រុង La Paz បានធ្វើឲ្យស្ទះចរាចរណ៍នៅតាមផ្លូវសំខាន់ៗនៅទីក្រុងរបស់ប្រទេសបូលីវី ដោយបានបិទផ្លូវរាប់សិបកន្លែងកាលពីថ្ងៃពុធ ទី២៥ ខែមីនា ធ្វើឲ្យរំខានដល់ពាណិជ្ជកម្ម និងបង្ខំឱ្យអ្នកដំណើរដើរក្នុងចម្ងាយឆ្ងាយ ខណៈធ្វើកូដកម្មរយៈពេល២៤ម៉ោង ជុំវិញការពន្យារពេលទូទាត់ប្រាក់សំណងសម្រាប់ការខូចខាតយានយន្តទាក់ទងនឹងប្រេងឥន្ធនៈ ដែលបានធ្វើឱ្យទីក្រុងជាប់គាំង។

កាលពីខែកុម្ភៈ ក្រុមហ៊ុនប្រេងរដ្ឋរបស់ប្រទេសបូលីវី (YPFB) បានរាយការណ៍ថា សំណល់កៅស៊ូ និងសារធាតុម៉ង់ហ្គាណែហ្ស ត្រូវបានរកឃើញនៅក្នុងអាងស្តុកប្រេងសាំង ដែលបណ្តាលឱ្យមានចំហេះមិនស្មើរនៅក្នុងសមាសធាតុប្រេងឥន្ធនៈ។

កាលពីថ្ងៃអង្គារ ទី២៤ ខែមីនា ក្រុមហ៊ុននេះបាននិយាយថា ក្រុមហ៊ុនបានបង់ប្រាក់ជាង ២១៧.០០០ ដុល្លារ ដល់អ្នកបើកបរជាង១.០០០នាក់ ជាអ្នកបានរាយការណ៍ពីការខូចខាតយានយន្តរបស់ពួកគេ ដែលត្រូវបានចោទប្រកាន់ថាបណ្តាលមកពីការប្រើប្រាស់ប្រេងសាំងខុសប្រក្រតី។ 

អ្នកបើកបរចូលរួមក្នុងការធ្វើកូដកម្ម បានអះអាងថា ការខូចខាតដោយសារប្រេងឥន្ធនៈគ្មានគុណភាព ដែលត្រូវបានចែកចាយកាលពីដើមឆ្នាំនេះ គំរាមកំហែងដល់ជីវភាពរស់នៅរបស់ពួកគេ ហើយកំពុងស្វែងរកសំណងសម្រាប់ការខូចខាតមេកានិចដែលពួកគេនិយាយថាបណ្តាលមកពីប្រេងឥន្ធនៈ។

មេដឹកនាំសហជីពបានព្រមានថា ពួកគេអាចពង្រីកការតវ៉ាដោយគ្មានកំណត់ ប្រសិនបើប្រធានាធិបតី លោក RodrigoPaz មិនជួបជាមួយពួកគេដោយផ្ទាល់ ដោយនិយាយថា ពួកគេលែងទុកចិត្តរដ្ឋមន្ត្រីរបស់លោកទៀតហើយ។ មានតែរថយន្តគិលានសង្គ្រោះ រថយន្តសង្គ្រោះបន្ទាន់ និងការដឹកជញ្ជូនដែលឆ្ពោះទៅកាន់អាកាសយានដ្ឋានអន្តរជាតិ El Alto ប៉ុណ្ណោះ ដែលត្រូវបានអនុញ្ញាតឱ្យឆ្លងកាត់។