យោងតាមទីភ្នាក់ងារសារព័ត៌មាន Fars ពាក់កណ្តាលផ្លូវការរបស់អ៊ីរ៉ង់ បានឱ្យដឹងថា សភាអ៊ីរ៉ង់កំពុងធ្វើការលើសេចក្តីព្រាងច្បាប់មួយ ដើម្បីគិតថ្លៃសេវា ជាថ្នូរនឹងការផ្តល់សន្តិសុខដល់នាវាដឹកជញ្ជូនដែលឆ្លងកាត់ច្រកសមុទ្រហ័រមូសដ៏សំខាន់។ ទីភ្នាក់ងារនេះបាននិយាយដោយសម្អាងដល់សមាជិកសភាអ៊ីរ៉ង់មួយរូបថា សេចក្ដីព្រាងនៃផែនការ ត្រូវបានរំពឹងថានឹងរួចរាល់នៅសប្តាហ៍ក្រោយ។

របាយការណ៍បានដកស្រង់សម្ដីប្រធានគណៈកម្មាធិការកិច្ចការស៊ីវិលរបស់សភាអ៊ីរ៉ង់ ដែលនិយាយថា៖ «សេចក្តីព្រាងច្បាប់មួយត្រូវបានរៀបចំរួចរាល់ហើយ ហើយនឹងត្រូវបញ្ចប់ក្នុងពេលឆាប់ៗនេះដោយក្រុមអ្នកច្បាប់របស់សភា។ យោងតាមផែនការនេះ អ៊ីរ៉ង់ត្រូវតែប្រមូលថ្លៃសេវា ដើម្បីធានាសុវត្ថិភាពរបស់នាវាដែលឆ្លងកាត់ច្រកសមុទ្រហ័រមូស»។

ជាមួយគ្នានេះ របាយការណ៍ព័ត៌មានផ្សេងទៀតបាននិយាយថា អ៊ីរ៉ង់ក៏កំពុងទាមទារឱ្យមានការទទួលស្គាល់ពីអន្តរជាតិលើសិទ្ធិរបស់ខ្លួនក្នុងការអនុវត្តការគ្រប់គ្រងលើច្រកសមុទ្រហ័រមូស ជាលក្ខខណ្ឌមួយក្នុងចំណោមលក្ខខណ្ឌទាំងប្រាំ ដើម្បីបញ្ចប់សង្គ្រាមដែលកំពុងបន្តជាមួយអាមេរិក និងអ៊ីស្រាអែល។

ចំណាត់ការរបស់អ៊ីរ៉ង់ក្នុងការចេញច្បាប់យកថ្លៃដឹកជញ្ជូនឆ្លងកាត់ច្រកសមុទ្រហ័រមូស កើតឡើងនៅពេលដែលសង្គ្រាមមជ្ឈិមបូព៌ា ខិតជិតដល់ចុងបញ្ចប់នៃសប្តាហ៍ទីបួនរបស់ខ្លួន។ ច្រកសមុទ្រហ័រមូស គឺជាកន្លែងឆ្លងកាត់នៃប្រេង ១ភាគ៥ ឬ ២០% របស់ពិភពលោក ហើយផ្លូវទឹកមួយនេះត្រូវបានបិទស្ទើរតែទាំងស្រុងដោយអ៊ីរ៉ង់៕