សារព័ត៌មានរ៉យទ័ររាយការណ៍នៅថ្ងៃព្រហស្បតិ៍ (២៦ មីនា) នេះថា ការកើនឡើងយ៉ាងគំហុកនៃតម្លៃប្រេងម៉ាស៊ូត ដែលបង្កឡើងដោយសង្រ្គាមមជ្ឈិមបូព៌ា កំពុងរុញច្រានឧស្សាហកម្មជលផលរបស់ថៃ ឱ្យខិតទៅរកភាពជាប់គាំងទាំងស្រុង។

ក្រុមអ្នកនេសាទព្រមានថា ពួកគេអាចនឹងត្រូវឈប់ចេញទៅនេសាទក្នុងប៉ុន្មានថ្ងៃខាងមុខនេះ បើរដ្ឋាភិបាលមិនចាត់វិធានការទប់ស្កាត់វិបត្តិទេនោះ។

ក្រុមមន្ត្រីបានឱ្យដឹងថា ថៃមានស្តុកប្រេងបម្រុងប្រហែល ១០០ថ្ងៃប៉ុណ្ណោះ។ តម្លៃប្រេងម៉ាស៊ូតនៅថៃ បានឡើងដល់ ៣៨,៩៤បាត (ឬ ១,១៩ដុល្លារ) ក្នុងមួយលីត្រ នៅថ្ងៃព្រហស្បតិ៍ ទី២៦ ខែមីនានេះ បន្ទាប់ពីការឧបត្ថម្ភធនរបស់រដ្ឋាភិបាលបានបញ្ចប់ ដែលកើនឡើងពីតម្លៃ ២៩,៩៤បាត ក្នុងមួយលីត្រ កាលពីខែកុម្ភៈ មុនពេលមានជម្លោះនៅមជ្ឈិមបូព៌ា។

ចាប់តាំងពីជម្លោះមជ្ឈិមបូព៌ាចាប់ផ្តើមនៅថ្ងៃទី២៨ ខែកុម្ភៈ ថៃបានប្រឈមនឹងការចំណាយលើថ្លៃដឹកជញ្ជូនកើនឡើងខ្ពស់ និងស្ថានីយប្រេងឥន្ធនៈរងផលប៉ះពាល់ខ្លាំង ទោះបីជាមានការធានាពីរដ្ឋាភិបាលថាការផ្គត់ផ្គង់នៅតែគ្រប់គ្រាន់ក៏ដោយ។

នៅកំពង់ផែនេសាទធំបំផុតរបស់ថៃ លោក Jumpol Kanawaree ប្រធានសមាគមអ្នកលក់ត្រី Samut Sakhon បាននិយាយថា ចំនួនជាង ៦០% នៃទូកនេសាទសរុប បានផ្អាកប្រតិបត្តិការ ហើយទូកផ្សេងទៀតក៏ទំនងជានឹងត្រូវបញ្ឈប់ការងារក្នុងប៉ុន្មានថ្ងៃខាងមុខនេះដែរ។ លោក Kanawaree បាននិយាយថា៖ «បន្ទាប់ពីថ្ងៃទី១ ខែមេសាទៅ ប្រហែលជាលែងមានត្រីលក់ទៀតហើយ ព្រោះទូកនេសាទមិនអាចទ្រាំទ្រនឹងការចំណាយខ្ពស់ខ្លាំងពេកបានទេ»៕